कामदारसँग भर्ना शुल्क उठाएका कारण आयातमा बन्देज लागेपछि मलेसियामा विभिन्न ग्लोव्स कम्पनीहरुले धमाधम कामदारले भर्ना वापत तिरेको रकम फिर्ता गर्न थालेका छन् । सोही क्रममा मंगलवार थप एक ग्लोव उत्पादक कम्पनीले कामदारलाई रकम फिर्ता गर्ने विषयमा सम्झौता गरेको छ । सो कम्पनीले कति दरले कामदारलाई रकम फिर्ता गर्दैछ र कुल कति रकम फिर्ता हुनेछ भन्ने बारेमा भनें विस्तृतमा जानकारी आउन बाँकी नै छ ।

मलेसियाका मलाक्का र कुलिममा फ्याक्ट्री रहेको एनसेलले बुधवार आफ्नो कम्पनीमा रोजगारीका लागि आएका ८ सय भन्दा बढी विदेशी कामदारलाई उनीहरुले भर्ना शुल्क वापत तिरेको रकम फिर्ता दिनेगरी सम्झौता गरेको छ । अधिवक्ता सुमिथा कृष्णनका अनुसार सो कार्यक्रममा विभिन्न मुलुकका दूतावासका प्रतिनिधिहरु, सो कम्पनीका प्रतिनिधिहरु तथा प्रतिनिधि कामदारहरु सहभागि थिए । सो कम्पनीमा कुन कुन मुलुकका नागरिक काम गर्दछन् भन्ने पुष्टि हुन भनें बाँकी छ । माइग्रेण्ट फोरम इन एसियाकी अध्यक्ष समेत रहेकी अधिवक्ता कृष्णाले यसले मलेसियामा मर्यादित भर्ना प्रकृयालाई प्रोत्साहित गर्ने र आप्रवासी कामदारले न्याय पाउने देशपरदेशलाई बताइन् ।

मलेसियाका ग्लोव्स उत्पादक कम्पनीहरुले रोजगारीका लागि आउने आप्रवासी श्रमिकलाई चर्को भर्ना शुल्क असुलेको र बाध्यकारी श्रम गर्नुपर्ने अवस्था सिर्जना भएको समाचार गार्जियन लगायतले लगातार प्रकाशित गरेपछि अमेरिकाले ति कम्पनीहरुका उत्पादनमा बन्देज लगाएको थियो । यसले विश्वकै ठूलो ग्लोव्य उत्पादक मलेसियाका कम्पनीहरु संकटमा परेका थिए । त्यसैले ग्लोव निर्माण गर्ने कम्पनी डव्लुआरपी एसिया प्यासेफिकले भर्ना शुल्क वापत कामदारले तिरेको रकम गत महिना देखि नै फिर्ता गर्न सुरु गरेको छ । सो कम्पनीले झण्डै ५० लाख अमेरिकी डलर फिर्ता गर्ने बताएको छ । त्रैमासिक रुपमा भुक्तानी गरिने शोधभर्ना वापतको सो रकम श्रमिकले ४ हजार ५ सय ४७ देखि १६ हजार ५४ रिंगिटसम्म प्राप्त गर्नेछन् । तर रकम फिर्ताको समयावधि धेरै राखिएको भन्दै त्यसको पनि अधिकारकर्मीहरुले विरोध गरेका छन् । सो कम्पनीमा मुख्यगरी नेपाली र बंगलादेशी नागरिक काम गर्दछन् । डव्लुआरपीमा ६ सय भन्दा बढी नेपाली कार्यरत छन् ।

यसैगरी डव्लुआरपीकै पछ्याउँदै अन्य ग्लोव्स उत्पादकहरुले पनि कामदारलाई भर्ना वापत तिरेको रकम फिर्ता गर्न सुरु गरिसकेको तथा केहिले आगामी महिना देखि फिर्ता गर्न सुरु गर्ने बताएका छन् । सो क्रममा मलेसियाको ठूलो ग्लोव उत्पादक कम्पनी टप ग्लोवले ५ करोड रिंगिट बरावर रकम श्रमिकहरुलाई फिर्ता गर्नुपर्ने प्रारम्भीक अनुमान सहित रकम फिर्ता गर्न थालिएको जनाएको छ । सो कम्पनीले पहिलो किस्ता वापतको रकम फिर्ता गरिसकेको बताएको हो ।

टप ग्लोवले विज्ञप्ती जारी गर्दै पहिलो किस्ता वापत आप्रवासी श्रमिकहरुलाई १० लाख अमेरिकी डलर (४४ लाख रिंगिट) रकम भुक्तान गरिसकेको जनाएको रोयटर्सले लेखेको छ । सो कम्पनीले ५ करोड ३० लाख रिंगिट रकम आप्रवासी श्रमिकलाई फिर्ता गर्नुपर्ने देखिएको समाचारमा जनाइएको छ ।

यसैगरी हार्टालेगा होल्डिङ्सले पनि श्रमिकले रोजगारीका लागि तिर्नुपरेको भर्ना शुल्क फिर्ता गर्ने योजना अगाडी सारेको छ । सो कम्पनीले पनि ४ करोड रिंगिट बरावर रकम श्रमिकलाई फिर्ता गर्नेगरी योजना बनाएको मलेसियाका स्थानीय सञ्चार माध्यमले लेखका छन् । अन्तराष्ट्रिय मान्यता अनुरुप आफ्नो कम्पनीले पनि श्रमिकसँग कुनै भर्ना शुल्क नअसुल्ने नीति रहेको भन्दै सो कम्पनीले यसअगाडी एजेण्टहरुलाई रकम तिर्न बाध्य पारिएकाहरुलाई सो रकम फिर्ता गर्ने भएको हो । यसले आफ्नो शुन्य लागत नीति प्रतिको प्रतिवद्धतालाई स्पष्ट पार्ने समेत सो कम्पनीले प्रष्ट्याएको छ ।

यसैगरी रिभरस्टोन होल्डिङ्स कम्पनीले आफ्नो कम्पनीमा काम गर्ने आप्रवासी श्रमिकलाई उनीहरुले भर्ना शुल्क वापत तिरेको ३४ लाख रिंगिट रकम जुलाई ३१ सम्ममा भुक्तानी गरिसकेको जनाएको छ । सो कम्पनीले पनि ग्लोव्स उत्पादन गर्दछ । सो कम्पनीका मलेसियाका अलावा थाईल्याण्ड, चीन लगायतका मुलुकहरुमा पनि कारखानाहरु सञ्चालनमा छन् ।

यो पनि पढ्नुहोस् जव परदेशमा अलपत्र परेकाहरुको पीडा सरकारमा बस्नेहरुले बुझ्दैनन् ….