आकर्षक तलवमा युरोप तथा दक्षिण अफ्रिका पठाइदिने प्रलोभन देखाई लाखौं असुलेको अभियोगमा वैदेशिक रोजगार विभागले पक्राउ गरेका केहि व्यक्ति विरुद्ध विभागले मुद्धा दायर गरेको छ । विभागका प्रवक्ता कविराज उप्रेतीका अनुसार उनीहरुले अनधिकृत रुपमा उठाएको रकम र त्यसको हर्जानाको मागदावी सहित मुद्धा दायर गरिएको हो ।

विभागका अनुसार खिम बहादुर गुरुङले चारजनालाई दक्षिण अफ्रिकामा रोजगारीमा पठाइदिने भन्दै २६ लाख ५० हजार अनधिकृत रुपमा उठाएको उजुरी परेको छ । गुरुङले वैदेशिक रोजगार ऐन, २०६४ विपरित काम गरेको देखिएकोले उनलाई चारजनाबाट उठाएको रकम र त्यसको ५० प्रतिशत हर्जाना असुल्नु पर्ने मागदावी सहित विभागले वैदेशिक रोजगार न्यायाधिकरणमा मुद्धा दायर गरेको छ ।

यसैगरी अर्जुन पोखरेलले अर्का एक व्यक्तिलाई सर्वियामा कृषि सम्वन्धि काममा पठाइदिने प्रलोभन देखाई चारलाख असुलेको भन्दै विभागले पोखरेल विरुद्ध पनि सो रकम र त्यसको ५० प्रतिशत हर्जाना दावी सहित न्यायाधिकरणमा मुद्धा दायर गरेको छ ।

यसैगरी उमेश सेति सुराल र आर्जु सेती सुरालले तीनजनालाई पोर्चुगल पठाउने नाममा जनही १३ लाखका दरले गरी ३९ लाख, सञ्जिव गौतमसँग ११ लाख उठाएको, दुईजनालाई कम्वोडिया पठाइदिने नाममा जनही ५ लाखका दरले १० लाख गरी ५५ लाख ५० हजार उठाएको उजुरी परेको छ । सुरालद्धय विरुद्ध पनि विभागले उठाएको रकम र त्यसको ५० प्रतिशत हर्जाना मागदावी सहित न्यायाधिकरणमा मुद्धा दायर गरेको छ ।

यसैगरी युएई पठाइदिने नाममा रकम असुलेको अभियोगमा मोहम्मद मोतिबाबु अन्सारी, भुवानी प्रसाद लामिछाने, रोशन राज शेख विरुद्ध पनि अनधिकृत रुपमा रकम असुलेको अभियोगमा मुद्धा दायर भएको छ ।

यसैबीच विभागले गलत काम गरेको अभियोगमा युनाईटेड मेनपावर एजेन्सीलाई निलम्वन गरेको छ । सो कम्पनीले बढी लागत रकम उठाएको उजुरी परेको थियो । यसैगरी युरो एशिया एचआर सोलुसनले उठाएको बढी रकम श्रमिकलाई फिर्ता गराउनुको साथै भविष्यमा यस्तो काम नदोहोर्याउन सचेत बनाउँदै १ लाख जरिवाना तिराएको विज्ञप्तीमा उल्लेख छ ।