मलेसियाका केहि कम्पनीहरुले श्रमिकले मलेसियामा रोजगारीका लागि आउँदा एजेण्टलाई तिरेको रकम फिर्ता गर्न थालेका छन् । मलेसियाका रवर ग्लोव उत्पादन गर्ने कम्पनी डव्लुआरपीले गत महिना देखि नै किस्तावन्दीमा रकम फिर्ता गर्दै आएको छ । यसैगरी अन्य केहि कम्पनीहरुले रकम फिर्ता गर्न थालेका छन् भनें केहिले आगामी महिना देखि फिर्ता गर्ने योजना बनाएका छन् ।

मलेसियाका स्थानीय सञ्चार माध्यमहरुका अनुसार मलेसियाको ठूलो ग्लोव उत्पादक कम्पनी टप ग्लोवले ५ करोड रिंगिट बरावर रकम श्रमिकहरुलाई फिर्ता गर्नुपर्ने प्रारम्भीक अनुमान गरेको छ । अमेरिकाले ग्लोव निर्यातमा लगाएको प्रतिवन्ध फिर्ता हुने अपेक्षाका साथ सो कम्पनीले उक्त रकम श्रमिकलाई फिर्ता गर्ने यसअगाडी नै बताईसकेको छ ।

टप ग्लोवले यस अगाडी नै नयाँ आउने श्रमिकका लागि शुन्य लागतको नीति अपनाइएको घोषणा समेत गरिसकेको छ । पहिले पनि कुनै पनि श्रमिकलाई भर्ना शुल्क तिराउने पक्षमा नरहेको सो कम्पनीले दावी गरेको छ । श्रमिकले भर्ना शुल्क तिर्नु परेको विषयलाई अमेरिकाले महत्वका साथ उठाएका कारण सो विषय यहि अगष्ट महिनाभित्रै सुल्झिने दावी पनि सो कम्पनीले गरेको छ ।

यसैगरी हार्टालेगा होल्डिङ्सले पनि श्रमिकले रोजगारीका लागि तिर्नुपरेको भर्ना शुल्क फिर्ता गर्ने योजना अगाडी सारेको छ । सो कम्पनीले पनि ४ करोड रिंगिट बरावर रकम श्रमिकलाई फिर्ता गर्नेगरी योजना बनाएको मलेसियाका स्थानीय सञ्चार माध्यमले लेखका छन् । अन्तराष्ट्रिय मान्यता अनुरुप आफ्नो कम्पनीले पनि श्रमिकसँग कुनै भर्ना शुल्क नअसुल्ने नीति रहेको भन्दै सो कम्पनीले यसअगाडी एजेण्टहरुलाई रकम तिर्न बाध्य पारिएकाहरुलाई सो रकम फिर्ता गर्ने भएको हो । यसले आफ्नो शुन्य लागत नीति प्रतिको प्रतिवद्धतालाई स्पष्ट पार्ने समेत सो कम्पनीले प्रष्ट्याएको छ ।

सो कम्पनीले आप्रवासी श्रमिकले भर्ना प्रकृयामा कुनै शुल्क तिर्नु नपर्ने कुरालाई सुनिश्चित गर्न कम्पनी सचेत रहेको जनाएको छ । कुनै एजेण्टलाई आप्रवासी श्रमिकले रकम तिर्ने विषय विश्वमै चुनौतिपूर्ण विषय रहेको भन्दै त्यसलाई निरुत्साहित गर्न कम्पनी सजग रहने हार्टालेगाका उच्च अधिकारीलाई उधृत गर्दै समाचारमा भनिएको छ, त्यसैले हार्टालेगाले आफ्नो कम्पनीमा रोजगारीमा रहेका आप्रवासी श्रमिकले भर्ना शुल्क तिर्नु परेको वा नपरेको विषयमा यकिन गरी रकम तिर्न बाध्य पारिएकाहरुलाई सो रकम फिर्ता गर्न स्वतन्त्र संस्थालाई जिम्मेवारी दिइएको र सोही अनुरुप रकम फिर्ता गर्ने तयारी गरिएको छ । सो कम्पनीले आगामी सेप्टेम्वर देखि रकम फिर्ता गर्ने योजना बनाएको छ ।

यसअगाडी डव्लुआरपीले गत जुलाई देखि नै भर्ना शुल्क बापत आप्रवासी श्रमिकले तिरेको रकम फिर्ता गर्न थालिसकेको छ । सो क्रममा १ हजार ६ सय आप्रवासी श्रमिकले किस्तावन्दीमा रकम फिर्ता पाउन थालिसकेका छन् । डव्लुआरपीले २ करोड १४ लाख रिंगिट आप्रवासी श्रमिकलाई उनीहरुले तिरेको भर्ना शुल्क वापत फिर्ता गर्दैछ । यसमा श्रमिकले कम्तीमा ४ हजार ५ सय ४७ देखि १६ हजार ५४ रिंगिटसम्म फिर्ता पाउँदैछन् । सो रकम ३० महिनाभित्रमा फिर्ता गरिसक्ने गरी डव्लुआरपीले हरेक महिना रकम फिर्ता गरिरहेको छ ।

मलेसियामा रोजगारीका लागि आउने श्रमिकले चर्को भर्ना शुल्क तिर्नुपरेको र बाध्यकारी श्रममा संलग्न हुनुपरेको भन्दै उनीहरुको चर्को श्रम शोषण गरिएको आवाज सञ्चारमाध्यम मार्फत उठेपछि अमेरिका लागायत विभिन्न मुलुकहरुले मलेसियाको ग्लोव आयातमा बन्देज लगाएका थिए । यसले विश्वमै ठूलो मात्रामा ग्लोव निर्यात गर्ने कम्पनीहरु टाट पल्टिने अवस्था आएपछि ति कम्पनीहरु आप्रवासी श्रमिकले भर्ना प्रकृयामा तिरेको रकम फिर्ता गर्न बाध्य भएका हुन् ।

यो पनि पढ्नुहोस् हालसम्म युएईबाट सवैभन्दा धेरै नेपाली स्वदेश फर्किए, कोरोनाका कारण विश्वमा १९१ नेपालीले ज्यान गुमाए