पिसिआर परीक्षण गरी नेगेटीभ रिपोर्ट भएका यात्रु मात्र ल्याउने गरी नियमित उडान भएका मुलुकहरुमा सम्वन्धित हवाईजहाज कम्पनीहरुले थप उडान गर्न सक्ने भएका छन् । पर्यटन मन्त्री योगेश भट्टराईका अनुसार कुनै कम्पनीले कम्पनीकै खर्चमा कामदारलाई नेपाल फर्काउन चाहेमा त्यसलाई प्राथमिकतामा राखेर उडान अनुमती प्रदान गर्ने निर्णय पनि भएको छ ।

उपप्रधान मन्त्री ईश्वर पोखरेल, परराष्ट्र मन्त्री प्रदीप ज्ञवाली, पर्यटन मन्त्री योगेश भट्टराई तथा श्रम मन्त्री रामेश्वर राय यादवका बीचमा भएको छलफल पश्चात यस्तो निर्णय भएको हो । मन्त्री भट्टराईका अनुसार यस विषयमा प्रधानमन्त्री केपी शर्मा ओली र उपप्रधान मन्त्री पोखरेलबीचको उच्चस्तरीय परामर्शबाट अन्तराष्ट्रिय उडानको संख्या थप्ने समझदारी भएको हो ।

यसैगरी वैदेशिक रोजगार बोर्ड अन्तर्गतको कल्याणकारी कोषको खर्चमा उद्धार गर्नु पर्नेहरुका लागि श्रम मन्त्रालयले सम्बन्धित देशमा रहेको नेपाली नियोगसँग समन्वयमा उडानको ब्यवस्था गर्ने निर्णय पनि भएको छ । नियमित उडान नभएका मुलुकमा पिसिआर नेगेटीभ रिपोर्ट भएका यात्रुका लागि मागका आधारमा उडान संख्या थप गर्ने पनि निर्णय भएको छ ।

मन्त्री भट्टराईले विदेशी भूमीमा अप्ठ्यारो अवस्थामा रहेका नेपाली प्रति सरकार संवेदनशील रहेको भन्दै उनीहरुको स्वदेश फिर्तीका लागि सरकारले सक्दो कोशिस गरिरहेको र सरकारले आफ्नो प्रयत्न बढाउँदै लैजाने बताएका छन् ।

यसअघि यहि हप्ता साउदी अरेवियामा ठूलो संख्यामा नेपालीले स्वदेश फिर्तिको माग गर्दै सरकार विरुद्ध नारावाजी गरेका थिए । यसैगरी साउदी अरेवियामा नै रहेका अन्य कम्पनीमा कार्यरत नेपालीले पनि स्वदेश फर्काउन माग गरेका थिए ।

यो पनि पढ्नुहोस् : उपत्यकाका जिल्ला प्रशासनको निर्णयः विदेश जाने व्यक्तिलाई आवतजावतमा सहजिकरण