साउदी अरवको एक कम्पनीमा रोजगारीका लागि पुगेका नेपालीहरुले महिनौं देखि रोजगारविहिन भएर अलपत्र अवस्थामा बस्नु पर्दा पनि नेपाल नफर्काएको भन्दै दूतावास र नेपाल सरकार विरुद्ध चर्को नारावाजी गरेका छन् । रियाद स्थित एक सप्लाई कम्पनीमा रोजगारीका लागि पुगेका उनीहरु मध्ये कतिपय ७ महिना देखि बेरोजगार छन् ।

अञ्जुलीमा ओभरसिजबाट साउदी गएका उनीहरु साउदी मेनपावर कम्पनी मार्फत रियाद स्थित सामास्को नामको कम्पनीमा रोजगारीमा रहेका थिए । तर कोभिड १९ को महामारीका कारण रोजगारी गुमेका उनीहरु ठूलो संख्यामा एउटै हलमा बस्न बाध्य छन् ।

मलेसियामा एक नेपालीलाई मृत्युदण्डको फैसला

रोजगारी उपलव्ध हुन नसकेपछि आफूहरुलाई नेपाल फर्काइदिन आग्रह गर्दा कम्पनीले दूतावासलाई देखाउने र दूतावासले कम्पनीलाई देखाउने गरेको सोही कम्पनीमा कार्यरत आफूलाई परदेशी कान्छो तेज भनेर चिनाउने एक नेपालीले देशपरदेशलाई बताएका छन् । उनले कम्पनीमा आफूहरुलाई फर्काउन आग्रह गर्दा टिकट वापतको रकम आफूहरुले दूतावासलाई बैंक मार्फत भुक्तानी गर्न खोजेको तर दूतावासले नगद नै जम्मा गर्न भनेको र आज दूतावासमा यस विषयमा कुरा गर्दा दूतावासका अधिकारीले कम्पनीले खातामा जम्मा गरेको रकमको भर नहुने भएका कारण नगद नै जम्मा गर्न आग्रह गरिएको बताएका छन् । यस बारेमा साउदी स्थित नेपाली दूतावासको धारणा लिने प्रयास जारी नै छ । यस विषयमा आवश्यक सहयोगका लागि नेपाली मजदुर एकता समाजले पनि आवश्यक समन्वयको काम गरिरहेको जनाएको छ ।

हिजो कम्पनीमा आफूहरुलाई नेपाल फर्काउन माग गर्दै ठूलो संख्यामा नेपालीले नारावाजी गरेको भिडियो सामाजिक सञ्जालमा सोमवार सार्वजनिक भएको छ । सो भिडियोमा उनीहरुले दूतावास तथा नेपालका प्रधानमन्त्री प्रति आक्रोश पोखेका छन् ।

यो पनि पढ्नुहोस् भिजिट भिषाको म्याद गुज्रिएकाहरुलाई विना जरिवाना स्वदेश फर्किने म्याद चार दिन बाँकी