नोबेल कोरोना भाइरस (कोभिड १८) का कारण लामो समयदेखि उद्योग, कलकारखाना, प्रतिष्ठानहरु बन्द हुँदा त्यसको असर रोजगारीमा रहेकाहरुमा पनि पर्न थालेको छ । देशपरदेशको जिज्ञासामा वैदेशिक रोजगारमा रहेकाहरु मध्ये कतिपयले गत मार्च महिनाको तलव पाएको बताएका छन् भनें केहि नेपालीले आफूहरुलार्ई खानेकुराको समस्या पर्न थालेको बताए  ।

साउदी अरेवियाको दमाममा कार्यरत  मकवानपुरका गौतम घलान तामाङले काम रोकिएका कारण आफूहरुलाई खानेकुराको समेत  अभाव हुन थालेको बताएका छन् । स्थानीय एक रेष्टुराँमा काम गर्ने उनीहरुले मार्च महिनाको तलव समेत पाउन नसकेको र रोजगारदाताले आफूहरुको खानेकुराको समेत कुनै वास्ता नगरेको गुनासो गरे । आफूहरु बसिरहेको होष्टलमा १७ जना नेपाली रहेको भन्दै घलानले रोजगारदातासँग फोनमा तलवको विषयमा कुरा गर्दा आजभोली आउँछ भनेर टारिरहेको बताए । खानेकुरा सकिंदै गयो, पैसा पनि छैैन देशपरदेशसँगको कुराकानीका क्रममा उनले भने यसले परदेशको ठाउँमा के खाएर बस्ने भन्ने चिन्ता बढेको छ ।

यसैगरी कतारमा कार्यरत हेभि ड्राइभरका रुपमा राजेन्द्र यादवले पनि आफूहरुको  मार्च महिनाको तलव हालसम्म नआएको बताए । “म त नेपाल फर्किन चाहन्छु तर कहिले फर्किन पाइने हो ठेगान छैन” कुराकानीका क्रममा उनले भने “अव कम्पनीले पनि धेरै कामदार राख्न नसकिने बताइसकेको छ ।”

मलेसियामा कार्यरत तेज ठकुरीले पनि आफूले मार्च महिनाको तलव नपाएको बताएका छन् । मलेसियाको पुचोङमा कार्यरत ठकुरीले काम गरे तलव पाइने नगरे नपाइने बताए । तर मलेसियामा कार्यरत अरु केहि नेपालीले भनें आफूहरुले मार्च महिनाको तलव पाएको बताएका छन् ।

साउदी अरेवियाको रियादमा कार्यरत ललित अर्यालले पनि आफूहरुको कार्यसमय घटाइएको भएपनि तलव भनें पाएको बताए । यसैगरी युएईमा कार्यरत मात्रिका सापकोटाले पनि आफूले मार्च महिनाको तलव प्राप्त गरेको बताएका छन् ।

कम्पनीहरुले तलव नदिएका कारण समस्या परेको भएमा त्यस्ता श्रमिकलाई सहयोग गर्ने काम केहि संघसंस्थाहरुले सुरु गरेका छन् । मलेसियाको स्थानीय ट्रेड यूनियन मलेसियन ट्रेड यूनियन कंग्रेसले अवागमन नियन्त्रणको समयावधि बढाइएको अवस्थामा कुनै श्रमिकले तलव नपाएको भएमा अनलाइन हेल्प डेस्क मार्फत सहयोग लिन सक्ने व्यवस्था गरेको छ । सो सम्वन्धि समाचार पढ्नु होस् । तलव काटियो, बेतलवी विदा वा कामबाट निकालेमा यी नम्वरमा फोन गर्नुस्

यसैगरी गैर आवासिय नेपाली संघले पनि अप्ठ्यारोमा परेका नेपालीलाई सहयोग गरिरहेको छ । एनआरएनए, मलेसियाका वरिष्ठ उपाध्यक्ष सुन्दर आलेका अनुसार आवागमन नियन्त्रणका कारण समस्यामा परेको गुनासो धेरै नेपालीको प्राप्त भएको छैन । केहि व्यक्तिले त्यस्तो समस्या परेको जानकारी गराएपछि उनीहरुलाई एनआरएनएका तर्फबाट रासनको व्यवस्था गरिएको आलेले बताए । कुनै नेपाललाई खानका लागि नै समस्या परेमा सहयोग गरिने उनले जानकारी दिए । खाद्यान्न उपलव्ध गराउन समस्या परेमा बैंकमा केहि रकम सहयोग गरिने पनि आलेले जानकारी दिए । वरिष्ठ उपाध्यक्ष अलेका अनुसार अन्य केहि संघसंस्थाहरुले पनि सहयोग गरिरहेका छन् ।

आवागमन नियन्त्रण लागु गरिएको भएपनि मलेसियामा नेपालमा जस्तो पुरै बन्दको अवस्था भनें छैन । खाद्यान्नका पसलहरु विहान ८ बजेदेखि बेलुकी ८ बजेसम्म खुल्ला रहेका छन्, बैंकहरु खुल्ला छन् भनें ट्याक्सीमा पनि अति आवश्यक काम परेमा एकजना हिंड्न पाइने गरेको एनआरएनए, मलेसियाका वरिष्ठ उपाध्यक्ष आलेले जानकारी दिए । उनका अनुसार मलेसियामा हालसम्म नेपालीहरु सुरक्षित नै छन् ।

एनआरएनए, साउदी अरेवियाले पनि कोरोना भाइरसको महामारीका कारण कुनै नेपालीलाई अप्ठ्यारो परेमा उद्दारका लागि यसअगाडी नै एक समिति बनाइसकेको छ । साउदी अरेवियामा कार्यरत नेपालीले सो समितिका सदस्यहरुलाई सम्पर्क गर्न सक्नेछन् । सो सम्वन्धि समाचार पढ्नु होस् । एनआरएनए, साउदीले गठन गर्यो उद्दार समिति

यो पनि तपाईलाई रुचिकर हुन सक्छ: ७७ प्रतिशत नेपालीको चासो स्वदेश फर्किने, सवैभन्दा धेरै मध्यपुर्वबाट