कम्पनीमा 
भाग्य अजमाउन 
जाँदा र आउँदा
काँचका घरहरूमा 
हेर्छु फर्की फर्की
आफ्नो आकृति !

सौ मन्जिला भित्ताहरूमा 
रंग पोतिरहँदा 
पर..
रेगिस्तानको मिराजमा
देखिरहन्छु आफ्नो तस्वीर !

तातो पानीले नुहाइदिई वरी
कपालमा लिरिक्क तेल लगाइदिएर आमाले 
टिलिक्क तालु टल्काइदिए झै,
टल्काउँछु भाँडाहरू निधार रसाउन्जेल 
र
तिनमा हेर्छु भाग्यको ऐना !

आहा !!
कति ठूलो छ मेरो निधार !
खुसी हुनुको कुनै सीमा हुन्छ भने
त्यो नाघेर मक्ख पर्छु !
चिच्याएर भन्न मन लाग्छ उत्तिबेलै-
गोरू चराउने रामेलाई
गाडी चलाउने श्यामेलाई
झिंगा धपाउने शिवेलाई
अनि 
मान्छे बेच्ने शंकरेलाई !
‘देख्यौ केटा हो मेरो भाग्य ?
यहाँ त सबथोक चिल्लै चिल्ला !
जे हेर्यो तिनै चिल्ला 
चिल्लाहरूले जिल्ल पार्दै
देखाइदिन्छन मेरो ठूलो निधार !’

कैलेकाहिं 
साहूले सामान बोक्न
पछाडीको सीट ‘अफर’ गर्यो भने 
झटपट सीसामा हेर्छु 
मुसुक्क मुँस्कुराउँछु 
सलूट गर्छु सुस्तरी आफूले आफूलाई
र
बिस्तारै पन्छाउँछु 
भाग्य छेक्ने चुल्ठोलाई 
निधार बाट पछाडितिर !
उत्तिबेलै खलासी बिरेलाई 
फोन गरेर भन्न मन लाग्छ,
‘कैलै कारको खलासी बनेको छस् लठूवा ?!’

यता दूरदेशमा,
थकान,सुस्केरा,निद्रा र चेतना..
अनौठा छन यी साथीहरू मेरा !
थकान संगै सुस्केरा आउँछ
तनावको तन्ना लिएर 
अनि 
चकचके चेतना आई बिथोल्न खोज्छ
सोझो निद्रालाई !
भन्छ-
‘ए चाँदे,
कति मक्ख छस् हाउ जिन्दगीमा !?
बुझेको छस्-
कित्ता कित्तामा पलट्टिंग भइसक्यो तेरो निधार 
र 
बेचिइसके सबै प्लटहरू !

एक कित्ता-पासपोर्टको राजस्वको लागि
अर्को कित्ता- नेताको सर्वस्वको लागि
तेश्रो कित्ता- बाको अहंको लागि
चौंथो कित्ता- आमाको दमको लागि 
र 
अन्तिम कित्ता संगिनीको सुनको लागि.. 
बेचिइसक्यो केटो तेरो निधार सप्पै !’

त्यसो त 
‘निधार ठूलो छ तेरो’ भनेर 
बा-आमा-आफन्त र संगीसाथीले जगाइदिएको
विस्वासको अगाडी
कहाँ पत्याउँछु र म 
फुच्चे चेतनाको कुरा !?

ठूलो स्क्रीन भएको मोबाइल 
पठाइदिएको छु बालाई यसपाली दशैंमा !
बा भन्नुहुन्थ्यो,
घरको तलो बढ्यो भने 
मेरो निधार
र 
आफ्नो नाकको आकार 
एकै पटक बढ्छ भनेर !

साइतको समय पारेर 
साहूले नदेख्ने गरी टोइलेटमा लुकेर 
ट्याक्क गर्नेछु भिडियो कल बा-आमालाई 
ठूलो स्क्रीन भएको मोबाइलमा 
र
पसार्ने छु स्क्रीनमा निधार 
‘ल, बा-आमा साइतको टिको लगाइदेऊ’ भनी,
‘भाग्यका आशीर्वाद बर्साइदेऊ’ भनी !
ठूलो स्क्रीन भएको मोबाइलमा 
मेरो निधार कत्ति ठूलो देखिएला ?!

आमा टोलाइरहनेछिन-
‘मेसिन खसेर लागेको 
निधारको खत 
अझै सन्चो भएनछ यसको’ भन्दै !
बाले आँखाका डिलभरी 
पानी रोकेर भन्नेछन-
‘निधार त ठूलै पाको होस् ठूले,
भाग्यमानी हुनू !

-हेमन्त गिरी,टोकियो