काठमाडौं, सर्लाहीको गौरीशंकरका रामबाबु महतो कमाउन १० बर्षअघि मलेसिया गएका छन् । तर उनी दुईबर्ष यता परिवारको सम्पर्कमा छैनन् । घरमा श्रीमति, तीन छोरा र तीनछोरी छोडेर मलेसिया गएका रामबाबु यसरी बेखवर भएपछि उनकी श्रीमति रामकुमारी देवीले बाख्रा, भैंसी पालेर गुजारा चलाउँदैछिन् । गाउँका अरु परदेशबाट फर्किंदा छोराछोरी रोएर आमा रामकुमारीलाई बसिनसक्नु बनाउँछन् ।

उनी भन्छिन् “मेरो मन फुट्ला जस्तो हुन्छ, रोइरहन्छु उनी आए हुन्थ्यो भनेर । मेरो आफन्त विदेशबाट फर्किनुभयो । उहाँ आउँदा कान्छो छोरो धेरै रोयो । मेरो बुवा आएको भए मलाई पनि समानहरु ल्याईदिन्थ्यो, कपडाहरु ल्याईदिन्थ्यो भनेर धेरै रोयो । धेरैबेर सम्झाएपछि बल्ल चुप लाग्यो ।”

यो पनि पढ्नुहोस् आमा भन्छिन्: विदेश गएको छोरो ज्यूँदै छ की खवर पाए हुन्थ्यो

रामबाबु विदेश जाँदा लिएको ऋण व्याज समेत थपिंदै अढाई लाख पुगेको छ । एकातिर श्रीमान् बेखवर हुँदाको पीडा त अर्कातिर ऋण र छोराछोरीको भविष्यको चिन्ताले सताएको छ रामकुमारीलाई । उनी बालबच्चाको पढाई लेखाईको समस्या र घरखर्च चलाउन अप्ठ्यारो परिरहेको बताउँछिन् ।

कमाउन मलेसिया गएर सम्पर्कविहिन रहेका रामबाबु महतोको घरमा केवल उनको नागरिकता छ । उनका बारेमा तपार्ईसँग कुनै जानकारी भएमा सुरक्षित आप्रवासन सुचना तथा परामर्श केन्द्र, हरिवन, सर्लाहीको फोन नम्वर ०४६–५३०६६४ मा खवर गरिदिनुहोला । उनका बारेमा थप जानकारीका लागि यो भिडियो हेर्नुहोस् ।