सुनिल न्यौपाने/ज्ञानेन्द्र यादव, मलंगवा-

मोहनगञ्ज, ब्रम्हपुरी ७ सर्लाही, भित्रि तराईको एउटा गाउँ । सर्लाहीको सदरमुकाम मलंगवाबाट पूर्वमा पर्ने यो गाउँमा हामी बौवेलाल सहनीको घर खोज्दै पुग्दा उनी घरायसी काममा व्यस्त थिए ।

भनिन्छ नी, “१२ छोरा १३ नाती, बुढाको धोक्रो काँधै माथि”, हो यस्तै भएको छ उमेरले ६० पुगेका यी बृद्धलाई पनि । जेठो छोरो रामजलम सहनी कमाउन ७ बर्ष अघि मलेसिया गएका हुन् । उनी झण्डै डेढ बर्षदेखि बेखवर भएपछि बाबु बौवेलाललाई सहिनसक्नु छटपटी भएको छ । एकातिर खेतमा खोला पस्यो, अर्कातिर कमाउने उमेरको छोरोले चटक्कै माया मार्यो ।

१ लाख १० हजार ऋण लिएर छोरोलाई कमाउन मलेसिया पठाएका थिए उनले । त्यो ऋण समेत ३ धुर घडेरी जग्गा बेचेर तिरे बौवेलालले । मलेसियाबाट केहि रकम कमाएर पठाएका पनि हुन् राम जलमले । छोराले पठाएको ७० हजार लगानी गरेर बनाएको घर पनि अव त पुरानो भइसक्यो । त्यसमाथि ४ नातिनातिनी, श्रीमति र बुहारी पाल्ने जिम्मेवारी पनि ६० बर्षे बौवेलालकै काँधमा छ । 

रामजलम बेखवर भएपछि सिंगै परिवार चिन्तामा डुवेको छ । आमा रामसुमारी देवीलाई खाइनखाई दुःख गरेर हुर्काएको छोरोले यसरी माया मारेको देखेर न रातमा निन्द्रा, न दिनमा भोक भएको छ । तनावले राती सुत्न समेत नसक्ने गरेको बताउने रामसुमारी देवीलाई छोरो घर फर्केर आफ्ना बालबच्चा जिम्मा लिइदिए धेरै ठूलो बोझ हल्का हुन्थ्यो भन्ने लागेको छ ।

बाबु बेखवर भएपछि रामजलमका जेठो छोरो भारतमा कपडाको काम सिक्न गएका छन् । एकातिर श्रीमान् फोन सम्पर्कबाट समेत हराउँदाको पीडा त छँदैछ, अर्कातिर छरछिमेकी र नातासम्वन्धका मान्छेले सोध्ने प्रश्नको जवाफ छैन प्रमिलादेवीसँग ।  

यदि तपाईसँग रामजलम सहनीका बारेमा कुनै जानकारी भएमा परिवारलाई नेपालमा ९८१७८६९१५० मा खवर गरिदिनुहोला । यसैगरी सुरक्षित आप्रवासन सुचना तथा परामर्श केन्द्र, मलंगवाको फोन नम्वर ०४६–५२१ ५०२ मा पनि खवर गरिदिनु सक्नुहुन्छ । आशा गरौं तपाई हाम्रो सामुहिक प्रयासले रामजलम सहनी फेला पर्नेछन् र उनी परिवारको सम्पर्कमा आउनेछन् ।

उनका बारेमा बनाइएको भिडियो हेर्नुहोस्