काठमाडौं– नवलपुर अरुणखोला, मध्यविन्दु १२ का सुमन दराई बैदेशिक रोजगारीका क्रममा मलेसिया गएका हुन् । २०७१ साउनमा बैदेशिक रोजगारीमा गएका उनी एक बर्षयता परिवारको सम्पर्कमा छैनन् । परिवारका सदस्यहरुका अनुसार झण्डै एक बर्षयता उनी परिवारसँग सम्पर्कमा छैनन् ।

सुमनकी आमा देवी भन्छिन्-“फोन गर्दा पनि उठाउँदैन । एकबर्ष भन्दा पनि धेरै भइसक्यो पैसा पनि नपठाउने, बुढीलाई फोन पनि गर्दैन । फोन गर भन्छु, विरामी हुँदा पनि के भा’को छ, कसो भा’को छ भनेर वास्तै गर्दैन । बरु पैसा पनि चाहिएन हामीलाई, उसलाई घर फर्काउने भन्ने सोचेको हो हामीले ।”

मलेसियाको मलक्कामा रहेको एचएलआरवी प्रोसेसिङ नामको कम्पनीमा काम गर्न गएका सुमनले आफ्नो काम र कमाईृ राम्रो नै भएको बताउने गर्दथे । तर यसरी अकस्मात फोन सम्पर्कसमेत हुन छोडेपछि यसले परिवारलाई अनेकथरी आशंकामा पारेको छ । पैसा कमाउन नसकेको भएपनि फोन गर्न र घर फर्किदिन आग्रह छ परिवारको । सुमनकी श्रीमति रिविका भन्छिन् “घर आउनु, बरु पैसा चाहिएको छैन, घर आउनु राम्रोसँग । घर आएर बरु यतै काम गरेर बसौंला ।”

सुमन दरईका बारेमा तपाईसँग कुनै जानकारी भएमा सुरक्षित आप्रवासन सुचना तथा परामर्श केन्द्र, कावासोतीको फोन नम्वर ०७८–५४०३११ मा खवर गरिदिनु होला । आशा गरौं तपाई हाम्रो सामुहिक प्रयासले सुमन दराई फेला पर्नेछन् र उनी परिवारको सम्पर्कमा आउनेछन् । (कावासोतीबाट राम बरालको सहयोगमा) 

भिडियो स्टोरी प्रकाशन भएपछि उहाँ परिवारको सम्पर्कमा आएका कारण भिडियो हटाइएको छ । सम्पादक