अर्जुन काफ्ले-

मलेसियामा कार्यक्रम गर्न पुगेका प्रायः कलाकारहरु विवादमा पर्दै आएका छन् । कहिले के विवाद त कहिले के प्रोपोगान्डामा कलाकार मुछिंदै आएका छन् । रेष्टुरेन्टमा ‘हर्कत’ गरेको आरोपमा राजेश पायल राई मुछिए त कहिले असहज भिडियो वनाएर ज्योती मगर र दमन रुपखेती चर्चामा आए । यतिसम्म की शरिरका अधिकाँश कपडा खोलेर रियाहरुले दर्शक उफारेको ईतिहास पनि छ मलेसियामा ।

हुन त अचेल मलेसियामा कन्र्सट गर्ने वाढी नै आएको छ । कहिले के धमाका त कहिले के कन्र्सटका नाममा । आइतवारे छुट्टीमा पनि नेपालबाट कलाकार लगेर कार्यक्रम गर्ने फेशन नै चलेको छ । विभिन्न संघ संस्थाहरु मात्रै होइन रेष्टुरेन्ट सञ्चालकले पनि यस्ता कार्यक्रम गर्न थालेका छन । 

मलेसियाका विभिन्न शहरमा गरिने यस्ता कार्यक्रम दर्शक तान्न र व्यावसायीकता लागि मात्र हँुदै आएको सत्यतालाई लुकाउन सकिंदैन । नेपालबाट कलाकार लैजाने अनि मलेसियामा नै भएका केहि कलाकारलाई स्टेज उकाल्ने कामको यस्ता कार्यक्रमले गर्दै आएका छन् । मलेसियामा रहेका नेपाली श्रमिकलाई लक्षित गर्दै गरिने केहि कार्यक्रमले केहि सकारात्मक काम पनि भएका छन । मगर संघ मलेसियाले नै यस अघि गरेको कार्यक्रमले केहि सकारात्मक काम गरेको उदाहरण देखिन्छ ।

राजेश पायल राईले खुकुरी रेष्टुरेन्टमा गरेको हर्कतले पुरै मलेसियाका नेपाली दुई कित्तामा उभिए । केहि राजेशको पक्षमा खुलेर लागे, राजेशको हर्कतको विरोध गर्नेलाई मार्नेसम्म भन्न पुगे । केहि भने राजेशको कमजोरी थियो भन्नेसम्म देखीए । तर राजेशले यो कुरामा माफी मागेनन् उल्टै समाचार वंगायाएर लेखेको भन्दै पत्रकारको उछितो काढे ।

त्यसपछिको विवादमा ज्योती मगर अनि रिया श्रेष्ठ आइपुगीन । आफ्ना अश्लिल हर्कतका कारण उनीहरुले अरु कलाकारलाई पनि विवादमा ल्याइदिए । त्यो वाहेक कलाकारको फोटो टाँसेर कलाकार नल्याउने काम गर्ने आयोजक पनि वेला वेला विवादमा आइरहे । कलाकार पठाउने ठेक्का लिएका ठेकेदारले नेपालबाट मलेसिया कलाकार नपठाउने क्रम पनि चल्यो भने कार्यक्रम आयोजना गर्ने केहि आयोजक संस्थाले भनेको कलाकार नल्याउने काम पनि भयो । कहिले टेरिया मगर, रेखा थापा, प्रमोद खरेल त कहिले शिव परियारको टाउको पोष्टर र टिकटमा टाँस्ने तर कलाकार नै नलग्ने हर्कत गर्ने आयोजकको फेरीहस्त पनि मलेसियामा छरपष्ट छ ।

मलेसियामा पछिल्लो पटक भएको घटनाको सार वारे चर्चा गर्न यो आलेख तयार गरिएको हो । त्यस कारण अरु वारे थप चर्चा अरु कुनै वेला गरौला । पछिल्लो समय नेपाल आइडल मार्फत चर्चामा रहेका सागर आले लगायतका कलाकार मलेसिया लगेर नेपाल मगर संघले एभरेष्ट कन्र्सट ३ को आयोजना गरेको थियो जुन केहि दिनसम्म मलेसियाका विभिन्न शहरमा हुनेछ । मलेसियाको राजधानी क्वालालम्पुरको कोतराया जो नेपालीहरुको सघन वसोवार र हेलमेल हुने ठाउँ हो । त्यहाँ कार्यक्रम आयोजना गरिएको थियो गत आइतवार । सो कार्यक्रममा अरु उल्लेख्य कलाकार नभएपनि सागर आले नै मुख्य कलाकार भएकाले आयोजकले सागर आले धमाका २०१७ को नाममा पोष्टर छापे । यता सो कार्यक्रम साँझ सकिने र नजिकैको शहर पोर्टकेलाङ्गमा सागर सहितका कलाकारलाई सम्मिलित गरेर रिल्याक्स धमाका नामको अर्को साँगितिक कार्यक्रम आयोजनाको चाँजोपाँजो मिलाइएको थियो ।

मगर संघका आयोजकसंग समन्वय गरेरै अर्को कार्यक्रमको चाँजोपाँजो मिलाइए पनि आइतवार अवेर सागर आलेले अर्को कार्यक्रममा जान नसक्ने र गाउन पनि नसक्ने जानकारी दिए । सागरले एउटै कार्यक्रमको धपेडीले विरामी भएको आयोजकलाई जानकारी दिए । उता अघिल्लो कार्यक्रमस्थल भन्दा करिव ४० किमी दुरीमा रहेको अर्क पोर्ट केलाङ्गको कार्यक्रममा दर्शक भरिन थाले । सुरुवातमा पोर्टकेलाङ्गको कार्यक्रमका आयोजकले सागर आउने र सागरको प्रतिक्षा गर्न दर्शकलाई सुझाइरहेका थिए । तर अकास्मत कार्यक्रममा सागर नआउने भएपछि एकाएक माहौल बदलियो । आयोजकलाई दर्शक थाम्न हम्मेहम्मे भयो । रातको समयमा भएकाले अझ थप चिन्ताको विषय वन्यो । पोर्टकेलाङ्गको आयोजकले सागरलाई कार्यक्रम स्थलसम्म ल्याइदिन मात्रै मगर संघसंग निक्कै विन्ती विसाए तर सागरले विरामी भएका कारण सो कार्यक्रममा जान नसक्ने वताए ।

राती त्यहिको आयोजकले सागरलाई दोषी देख्दै सागरको पुत्ला वनाएर कार्यक्रमै जलायो । माहौलले वेग्लै रुप लियो । केहिले सागरलाई गाली गरे भने केहि दर्शकले सागरको नाम वेचेर आयोजकले झुक्याएको आरोप लगाए । फेसवुक र अन्य सामाजिक सञ्जाल भरी सागर आलेका पक्ष र विपक्षमा वहस भयो । तर यत्रो हुँदा पनि मगर संघ मलेसिया चुप वसिरहनुले शंका पैदा गराएको छ । मगर संघ मलेसियाका जिम्मेवारहरु चुँ पनि वोल्न सकेका छैन् भने उनीहरु सञ्चारकर्मीको सम्पर्कमा आउन पनि मानेका छैनन् । यसले झन शंका माथी थप शंका उव्जाएको छ ।

मगर संघका आयोजक कै निर्णयले दिउँसो कोतरायामा र साँझ पोर्टकेलाङ्गका कार्यक्रम आयोजना गर्ने भएर पोर्टकेलाङ्गका आयोजकले पोष्टर छाप्ने देखी टिकट बेच्नेसम्म काम गरे । त्यसपछि कार्यक्रमको सवै तयारी थाले । यति हुँदासम्म मगर संघले त्यो कार्यक्रम वारे सागरलाई जानकारी किन दिएन ? यदि दिएको थियो भने सागरले कार्यक्रममा जान मानेनन भनेर पुर्व जानकारी त्यहाँका आयोजकलाई किन दिन सकेन ? के ‘दालमा कुछ काला’ थियो त ? मगर संघका केहि सदस्यले सागरलाई पोर्टकेलाङ्गको कार्यक्रममा पठाउने र केहिले नपठाउने निर्णय त गरेका थिएनन कतै ? शंका त्यहाँ पनि छ । शंका गर्ने प्रसस्त ठाउँ हुँदा हुँदै किन मगर संघ चुपचाप त ?

मलेसियामा कार्यक्रम आयोजना गर्नेहरुका विच नि को कलाकार ल्याउने र कस्ता कलाकार ल्याउँदा धेरै दर्शक आउन सक्छन भनेर होडवाजि नै हुन्छ । त्यही क्रममा सागर आले दर्शक तान्ने शस्त्रका रुपमा मगर संघले पहिल्याएको हुन सक्छ । यहि कारण पनि सागरलाई मगर संघले केहि स्थानका लागि मलेसिया ल्याएको हो ।

सागर आलेले पहिलो कार्यक्रममा आफ्नो प्रस्तुती दिइसके पछि अर्का कार्यक्रमका लागि सागरसँग आयोजकले केहि कुरा गरेको थियो कि थिएन त्यो सागर र आयोजक वाहेक अरुलाई थाहापत्तो हुने कुरा पनि भएन । तर सागरले अर्का कार्यक्रमका लागि अनुवन्ध स्वीकार गरेर पनि कार्यक्रममा जान विरामीको नाटक गरेका भए पोर्टकेलाङ्गको कार्यक्रमका आयोजक सागर प्रति रुष्ट हुनु स्वाभाविक हो । हैन सागरलाई थाह पत्तो नदिइ त्यो कार्य भएको भए चैं निन्दनिय र खेदपूर्ण छ ।

सागर प्रतिभाशाली कलाकार हुन । सागरलाई नेपाल आइडलको टप फोरमा पु¥याउन तिनै मध्येका धेरैको हात छ । सागरले घमण्ड गरेका हुन वा आयोजकले फटाइ गरेका हुन अवको केहि समय पछि थाहा हुन्छ । यदि आयोजकको फट्याइले सागरको पुत्ला जलेको हो भने त्यसको क्षतिपुर्ती कसले भर्छ ? सोचनिय कुरा छ । र अव आइ्न्दा यस्ता कार्यक्रममा कलाकार जाँदा पहिला सवै कुरा वुझेर मात्र विदेश जानु पर्छ । विदेशका कार्यक्रम भन्ने वितिक्कै हाम फालेर जानु पनि हुन्न ।

यो पनि पढ्नुहोस् 

‘मेरो छोरो बचाई दिनुस’