आशिश राई-

हाल नेपाल बाहिर लाखौं नेपाली युवा श्रम गरी रहेका छन् । बैदेशिक रोजगारीमा जानु पूर्व, बैदेशिक रोजगारीको क्रममा रहँदा र स्वदेश फर्किएपछि हामीले ध्यान दिनुपर्ने थुप्रै कुरा हुन्छन् । यदि तपाई बैदेशिक रोजगारीमा जान लाग्नु भएको छ र कुनै समस्या परेमा तपाईलाई सहयोग गर्नेहरु हुन्छन् ।

यसैगरी विदेशमा कार्यरत रहँदा पनि तपाईले धेरै कुरामा सचेत हुनु पर्दछ । कुनै अप्ठ्यारो परेमा त्यहाँ पनि सहयोग गर्नेहरु हुन्छन् । त्यहाँ विभिन्न कार्यक्रम गर्ने संघसंस्था हुन्छन् । त्यहाँबाट पनि सहयोग लिन सकिन्छ । तपाई बैदेशिक रोजगारीको क्रममा हुनुहुन्छ भनें यी कुरामा ध्यान दिनुहोस्ः

विदेशमा ध्यान दिनुपर्ने कुरा

रक्सी खाँदै नखानुहोला । हामीले जेलमा भट्दा धेरै मानिसहरू रक्सी खाएर झैझगडा गरेको कारण जेल आउने गरेका पाईएको छ ।

रक्सी खान लिकर कार्ड पाएपछि मात्र किन्न पाईन्छ । त्यसको लागि कम्पनीले दिएको एनओसी लेटर चाहिन्छ । तर ३००० वा ४००० भन्दा धेरै तलब हुनेहरूले मात्र यो पाउँछन् ।

आफ्नो नजिकैको साथीलाई चाहिएको भनेर जथाभावी रक्सी लिएर हिँड्नु हुँदैन । त्यस्तो केसमा परेको मानिसलाई जो कोहीले निकाल्न पनि चाहँदैन ।

जेल राम्रो हुन्छ तर जेल त जेल नै हो नि हैन र ?

आफुले फोटो खिच्ने ठाउँको पछाडी अरेवियन महिला छन् भने फोटो नखिच्नु होला । 

विदेशमा जहाँ पायो त्यहि खैनी नमोल्नु होला । यसले गलत अर्थ लाग्न सक्छ ।

भनिएको काम नै पाइन्छ भन्ने छैन

त्यहाँ भनिएको काम सबैले पाउँदैनन् । जे जस्तो परे पनि गर्छु भनेर तयारी गरेर जानेले जित्छ । सार्वजनिक यातायातमा महिलालाई सजिलो छ। त्यहाँको बसहरूमा राम्रो आरक्षणको व्यवस्था गरिएको हुन्छ । १२ वटा सिटहरू महिलाको लागि राखिएका हुन्छन् ।

महिलाहरूको लागि विशेष सुझाव

पुलिसले पक्रिँदा महिला पुलिस नभई जान्न भन्न पाइन्छ । त्यहाँ कुनै कारणले पुलिसले पक्रियो भने म महिला प्रहरी नआइ जाँदिन भन्न पाईन्छ । धेरैले हिन्दी भाषा बुझ्ने भएकाले अरबी आउँदैन भनेपनि त्यति कुरा बताउन सकिन्छ ।

आपत् परेमा वा घरधनीले दुर्व्यवहार गरेमा ९९९ मा फोन गर्नुपर्छ । यो त्यहाँको इमर्जेन्सी नम्बर हो । यसमा डायल गरेपछि फोन उठेन भनेपनि लोकेसन थाहा पाएर प्रहरी आफै उद्धार गर्न आउँछ । त्यहाँका एनआरएनएलाई पनि सम्पर्क गर्न सकिन्छ ।

महिलालाई परिवार लैजान गाह्रो छ । त्यहाँ जाने महिलाहरूले परिवार लैजानलाई त्यति सजिलो छैन । कमाइ कम्तीमा पनि महिनाको स्थानीय मुद्रा १० हजार भन्दा धेरै हुनुपर्छ । पुरुषहरूको हकमा भने ३५०० देखि ४००० तलब हुँदा लैजान पाईन्छ । त्यसैले परिवारसँग सल्लाह गर्दा त्यही रूपमा गर्नु राम्रो हुन्छ । श्रीमानको सीप राम्रो छ भने उनी गएर कमाउने भनेर तयारी गर्न सकिन्छ ।

यौनको मामिलामा सजग हुनुपर्छ । यदि विदेशमा यौन सम्पर्क भयो र श्रीमती भएको कोही मानिससँग थियो भने कुनै झमेला परेमा प्रहरीले केटीलाईनै दोष लगाउँछ । त्यसैले यौन सम्वन्धले अनावश्यक समस्यामा पार्न सक्छ ।

ओपन डेज इन्टरभ्यु को बारेमा

ओपन डेज इन्टरभ्यु भनेको त्यहाँका विभिन्न कम्पनीहरूले कामदारलाई सिधै लिनको लागि अन्तर्वार्ताको लागि बोलाउने तरिका हो । यसमा राम्रोसँग छनौट हुन सक्यो भने राम्रो जागिर पाउन सकिन्छ । यसमा अनुभवलाई प्राथमिकता दिइन्छ । यसो हेरेर आफूले गर्नसक्ने कामको लागि आवेदन दिएमा चाँडै प्रगति हुन्छ । बायोडाटा बनाएर बेलाबेला पठाइराखेको राम्रो हो ।

(राई बैदेशिक रोजगारको क्षेत्रमा काम गर्ने संस्था चियर नेपालका प्रमुख हुन् ।)

यो पनि पढ्नुहोस्
आमा भन्छिन् स् विदेश गएको छोरो ज्यूँदै छ की खवर पाए हुन्थ्यो