सुनिल न्यौपाने-

हुन त बैदेशिक रोजगारमा गएर मृत्यु भएका आफन्तलाई राहत रकम थाप्न वा अंगभंग भएर फर्केकाहरुलाई त्यो रकम बुझ्न कति कष्टकर हुँदो हो, त्यो भोग्नेहरुलाई नै थाहा छ । तर पनि त्यो रकम समेत कतिपय अवस्थामा नपाउने वा पाएपनि सानो रकम यताउतिमै सकिने समस्या कमसे कम अव केहि हटेको छ । बैदेशिक रोजगार नियमावली संशोधन भएपछि अंगभंग भएर फर्किनेहरु र मृतकका परिवारले पाउने रकमको मात्रा बढेको छ ।

नियमावली संशोधन पश्चात मृतकका परिवारले पाउने रकम न्यूनतम २२ लाख पुगेको छ । बीमा र बैदेशिक रोजगार प्रवद्र्धन बोर्डबाट पाउने रकम जोड्दा त्यति रकम पुग्दछ । यसैगरी अंगभंग भएर फर्किनेहरुको हकमा पनि सोही आधारमा रकम प्राप्त हुने व्यवस्था हुनु सकारात्मक कुरा हो ।

संशोधित नियमावलीले करार अवधि सकिएको एक बर्षपछिसम्म पनि क्षतिपूर्ति दिने बाटो खुल्ला गरेको छ । यसका कारण चाहेर पनि रोजगारदाताका कारण वा अन्य कारणले समयभित्रै स्वदेश फर्किन नपाएकाहरु वा तिनका परिवारलाई परेको समस्या समधान भएको छ । यो स्वागतयोग्य कुरा हो । यहि व्यवस्था नभएका कारण थुप्रै व्यक्तिले समस्या भोगिरहेका थिए ।

कुनै व्यक्तिको मृत्यु हुँदा दिइने रकमको मात्रा बढ्नु सुन्दा उति रुचिकर नहोला । स्वदेशमा रोजगारी नपाएर पराई भूमिमा पुगेको कुनै एउटा नेपालीको परिवारले गुमाउने प्रियजनको शोधभर्ना पनि त्यो रकमले गर्न सक्दैन । तर आर्थिक अवस्था कमजोर भएर परिवार पाल्न परदेश पुगेको कमाउन सक्ने उमेरको परिवारको सदस्यको मृत्यु भएपछि आइपर्ने थप आर्थिक भारलाई यसले पक्कै केहि कम गर्नेछ । मृतक वा घाइतेका परिवारका छोराछोरीलाई पठनपाठनको व्यवस्था लगायतको व्यवस्थाले नेपाल बैदेशिक रोजगारमा गएका आफ्ना नागरिकप्रति उत्तरदायी छ भन्ने अवस्थामा आइपुगेको छ ।

राहत रकम बृद्धि र शिक्षा सहयोगसँगै विदेशका जेलमा परेका नेपाली नागरिकका लागि कानूनी सेवा दिने बाटो पनि अव खुलेको छ । विदेशमा जेल परेका नेपालीका लागि वकिल राखेर कानूनी उपचारमा जाने सहयोग राज्यले नै उपलव्ध गराउने भएपछि अनाहकमा अन्यायमा परेका थुप्रै नेपालीले न्याय पाउने अपेक्षा गर्न सकिन्छ ।

मुलुकको कुल गार्हस्थ्य उत्पादनमा झण्डै ३२ प्रतिशत योगदान गर्ने रेमिट्यान्स पठाउने आफ्ना नागरिकप्रति राज्य जुन रुपमा संवेदनशील हुनुपथ्र्यो यसअघि त्यो रुपमा थिएन । लामो प्रयत्नपछि राज्यले बैदेशिक रोजगारीमा रहेकाहरु र तिनका परिवारलाई आपतमा राज्य छ भन्ने आभाष दिलाएको छ । यो सकारात्मक कुरा हो ।  

यो पनि पढ्नुहोस्

घरबाट नागरिकता मगाएपछि हराएको छोरो खोजिदिन आमाको आग्रह