सरकारले यस अगाडी प्रस्ताव गरेका मध्ये कतारका लागि प्रस्तावित राजदूत नरेशविक्रम ढकाल, साउदी अरेबियाका लागि प्रस्तावित नवराज सुवेदी, दक्षिण कोरियाका लागि प्रस्तावित ज्योति प्याकुरेल र अस्ट्रेलियाका लागि प्रस्ताव गरिएका कैलाशराज पोखरेलको नाम संसदिय समितिले अनुमोदन गरेको छ । संसदको सुनुवाई समितिले उनीहरुको नाम अनुमोदन गरेको हो ।

नयाँ सरकार गठन भएसँगै फिर्ता बोलाइएका र राजदूतको अवधि सकिएका मुलुकहरुमा सरकारले नयाँ राजदूतहरु पठाउन लागेको हो । समितिले यस अगाडी नै मलेसियाका लागि सिफारिस भएका डिल्लीराज पौडेल, शर्मिला पराजुली ढकाल (स्पेन), मिलन तुलाधर (रुस), शान्ता रिजाल (इजराइल), विष्णुपुकार श्रेष्ठ (चीन) र दानबहादुर तामाङ (दक्षिण अफ्रिका) को नाम अनुमोदन गरिसकेको छ ।

संसदीय समितिले अनुमोदन गरेपश्चात प्रस्तावित राजदूतको नाम स्वीकृति (एग्रिमो) का लागि सम्बन्धित मुलुकमा पठाउने गरिन्छ । सो मुलुकले प्रस्तावित राजदूतको नाम स्वीकृत गरेर पठाएपछि राष्ट्रपतिले उनीहरुलाई नियुक्त गर्ने प्रावधान छ ।

यो पनि पढ्नुहोस् कतारको दावी: हामीले गरेको काम गर्व गर्न लायक