युनाईटेड अरब ईमिरेट्स (युएई) मा हालसम्म कोभिड १९ को कारण एक जना महिला सहित ३२ जनाको मृत्यु भएको छ । नेपाली दुताबास अबुधाबीले दिएको जानकारी अनुसार विगत ४ महिनाको अवधिमा युएईमा मृत्यु भएका १ सय १ जना नेपाली मध्ये ३२ जनाको मृत्यु कोभिडका कारण भएको हो । अन्यको भनें विभिन्न कारणले मृत्यु भएको हो ।
नेपाल पत्रकार महासंघ युएई शाखाले आयोजना गरेको अनलाईन छलफल कार्यक्रममा बोल्दै युएईका लागि नेपाली राजदूत कृष्ण प्रसाद ढकालले महिनाको २५ जनाको अर्थात झण्डै प्रतिदिन १ जनाको मृत्यु हुनु दुःखद भएको बताएका छन् ।
मृत्यु भएका मध्ये कोभिड १९ ले मृत्यु भएका सहित ६१ जना नेपालीहरुको शवको अन्त्येस्टी युएईमा नै गरिएको छ । त्यसैगरी १६ जनाको शव चार्टर उडान मार्फत नेपाल लगिएको छ । बाँकी १६ जनाको शव नेपाल लैजाने प्रकृयामा रहेको र ८ जनाको मृत्युको बारेमा अनुसन्धान जारी रहेको राजदूत ढकालले बताए ।
सन २०१९ को एक बर्षको अवधिमा युएईमा जम्मा १०५ जनाको मृत्यु भएको थियो भने सन २०१८ बर्षभरिको अवधिमा १०३ जनाको मृत्यु भएको थियो ।