श्रम मन्त्री रामेश्वर राय यादवले वैदेशिक रोजगार बोर्डमा बोर्ड सदस्यका रुपमा मनोनित गरिएका वैदेशिक रोजगार व्यवसायी हेम बहादुर गुरुङले सो जिम्मेवारी अस्वीकार गरेका छन् । उनले विभिन्न कारणहरु देखाउँदै सो जिम्मेवारी लिन नसक्ने जानकारी मन्त्री यादवलाई गराएका छन् ।

गुरुङले मन्त्री यादवको सचिवालयमा निवेदन दर्ता गराई आफूले पनि सामाजिक सञ्जालहरुबाट आफूलाई मनोनित गरिएको जानकारी पाएको बताएका छन् । उनले आफूलाई बोर्डमा आफ्नो योग्यता र दक्षता अनुसारको परिणाममुखी काम गर्ने ईच्छा हुँदा हुँदै पनि विश्वव्यापी रुपमा फैलिएको कोभिड-१९ महामारीबाट सिर्जित विषम परिस्थीति र यसका कारण समग्र विश्व अर्थतन्त्रमा पर्न गएको नकारात्मक असर, वैदेशिक रोजगारको क्षेत्रमा देखिएको जटिलताका कारणले बोर्ड सदस्यका रुपमा काम गर्न नसक्ने बताएका छन् । निवेदनमा व्यक्तिगत अस्वस्थतालाई समेत जिम्मेवारी लिन नसक्नुको कारण उल्लेख गरिएको छ ।

श्रममन्त्री यादवले जेठ २१ गते गुरुङ तथा स्वास्थ्य व्यवसायी कैलाश खड्कालाई वैदेशिक रोजगार बोर्डको सदस्यमा मनोनित गरेका थिए । खड्का यसअगाडी रोजगारीका लागि मलेसि या जाने श्रमिकलाई चर्को आर्थिक शोषण हुने बायोमेट्रिक लागु गराई स्वास्थ्य क्षेत्रमा सिण्डिकेट चलाएको अभियोगमा प्रहरीको फरार सूचिमा परेका व्यक्ति हुन् ।

तत्कालिन श्रममन्त्री गोकर्ण विष्टले बायोमेट्रिक गराउने संस्था सहित, भिएलएन, जिएसजी लगायतलाई अवैधानिक घोषणा गरेपछि प्रहरीले केहि व्यक्तिलाई पक्राउ गरेको थियो । सो क्रममा पक्राउ सूचिमा रहेका खड्का भनें लामो समय प्रहरीको ‘फरार’ सूचिमा थिए । पछि खड्काले अदालतबाट सफाई पाए पनि उनी पटक-पटक विवादमा पर्दै आएका व्यक्ति हुन् । खड्कासँगै बोर्ड सदस्यमा मनोनित गुरुङले भनें आफू सो पदमा नबस्ने जानकारी गराएका हुन् ।

यो पनि पढ्नुहोस् म सम्भावित कोरोना संक्रमित