कोरोना भाइरस (कोभिड १९) का कारण मुलुकमा लकडाउन (बन्दाबन्दी) सुरु भएपछि नेपालका पाँच तारे होटलहरुले धमाधम आफ्ना श्रमिकहरुलाई सामाजिक सुरक्षा कोषमा सूचिकृत गरेका छन् । लकडाउनका कारण होटलहरु बन्द अवस्थामा नै पुगेको र कर्मचारीहरुलाई सेवा सुविधा दिनुपर्ने चेपुवामा परेका होटलहरुले आफ्ना कामदार, कर्मचारीहरुलाई कोषमा सूचिकृत गर्न थालेका हुन् ।

सामाजिक सुरक्षा कोषका अनुसार लकडाउन पश्चात होटल हायात, होटल अन्नपूर्ण, होटल सोल्टी क्राउन प्लाजा, होटल र्याडीसन तथा होटल याक एण्ड यतिले आफ्ना कामदार, कर्मचारीहरुलाई कोषमा सूचिकृत गराएका छन् । ति होटलहरुमा कार्यरत झण्डै चार हजार श्रमिक यसबीचमा सूचिकृत भएको कोषले जनाएको छ ।

कोषका कार्यकारी निर्देशक कपिलमणि ज्ञवालीका अनुसार गत चैत्रको योगदान रकम सरकारले जम्मा गरिदिएपछि पनि कोषप्रति रोजगारदाता तथा श्रमिकहरुको आकर्षण बढेको हो । श्रमिक तथा रोजगारदाताका तर्फबाट चैत्र महिनामा कोषमा गर्नुपर्ने योगदान वापतको १८ करोड रकम सरकारले उपलव्ध गराएको छ । हालसम्म कोषमा ९६ करोड योगदान रकम संकलन भइसकेको कोषले जनाएको छ ।
कोषमा गत बैशाख १० गतेसम्ममा १२ हजार ३ सय ३० रोजगारदाता तथा १ लाख ५७ हजार योगदानकर्ता सूचिकृत भइसकेको कोषको तथ्याङ्क छ ।

किन आवश्यक छ सामाजिक सुरक्षा ? हेर्नुहोस् डकुड्रामा

यो पनि पढ्नुहोस् खुशी रहौं, मनोसामाजिक समस्याबाट यसरी बचौं