नेपाल ट्रेड यूनियन महासंघ (जिफन्ट) ले सामाजिक सञ्जाल तथा केही सञ्चार माध्यमले वास्तविकतालाई अतिरञ्जित बनाईरहेका कारण त्यसले समाजमा भ्रम उत्पन्न भईरहेको भन्दै यसमा सजग रहन आफ्ना सदस्यहरुलाई आग्रह गरेको छ । जिफन्टले प्रेस विज्ञप्ती प्रकाशित गर्दै जिफन्ट आवद्ध सबै सदस्यहरूलाई साँगठानिक प्रणाली र पद्धतीलाई जीवन्त राख्दै आ–आफ्नो संयन्त्र मार्फत वास्तविकता बुझेर तथ्यपरक सूचनाहरू मात्र सार्वजनिक गर्न सक्रिय रहन पनि अनुरोध गरेको छ ।

जिफन्टका महासचिव जनक चौधरीद्दारा जारी विज्ञप्तीमा कोभिड १९ को कहरबाट बच्न जारी लकडाउनको समयमा सामाजिक सद्भाव तथा दूरी कायम गर्दै एकतावद्ध भएर धैर्यताकासाथ लकडाउनको पालना गर्नुको विकल्प नभएको उल्लेख छ ।

जिफन्टले लकडाउन लम्विदै जाँदा श्रमिकहरूलाई खाद्य सामग्रीको अभाव भएको भन्दै मन्त्रीपरिषद्ले राहत वितरण गर्ने निर्णय समयमै गरेको भएपनि स्थानीय तहबाट राहत वितरण गर्ने तरिका तथा मापदण्ड पालिकापिच्छे फरक बनाईएको र रोजगारदाताहरूले दैनिक ज्यालादारी, अस्थायी तथा करार सेवामा काम गर्ने श्रमिकको अभिलेख नराखेको कारण श्रमिकहरूले सहज रूपमा राहत नपाएको धारणा राखेको छ ।

श्रमिकहरूले राहत नपाएको र पैदल नै यात्रा गरीरहेको अवस्था प्रति गम्भीर रूपमा ध्यानाकर्षण भएको भन्दै सीमित साधन र स्रोतका वावजूद तिनको परिचालन गरी जिफन्ट र आवद्ध यूनियनको पहलमा पैदल हिंडिरहेका श्रमिकहरूलाई खाद्यान्न तथा यातायातको ब्यवस्था गर्न स्थानीय प्रशासनसँग समन्वय गरेर सहयोग गरिरहेको जनाइएको छ । थप ब्यवस्थापन गर्न सम्बन्धित निकायहरूमा नियमित छलफल र संवाद जारी रहेको भन्दै जिफन्टले अब छिट्टै यो समस्याको समाधान हुने अपेक्षा पनि प्रकट गरेको छ ।

विज्ञप्तीमा भनिएको छ “संकट देखाएर ऐन कानून र सरकारले जारी गरेको आदेशको अपहेलना वा उल्लंघन गर्ने छुट कसैलाई पनि हुँदैन । औपचारिक श्रम क्षेत्रमा कार्यरत श्रमिकहरूको पारिश्रमिकको सन्दर्भमा रोजगारदाताहरूको संगठन एफएनसीसीआई, सिएनआईको पदाधिकारीहरूसँग नेपाल सरकारको निर्णय कार्यान्वय गर्ने गराउने बिषयमा छलफल भएको छ । त्यसैले हरेक कार्यथलोको सूचना कमिटीगत प्रणाली अनुसार ब्यवस्थित र सम्प्रेषण गर्न जिफन्ट र जिफन्टमा आवद्ध सबै कमिटी तथा सदस्यहरूलाई अनुरोध छ ।”
कतार, यूएई, बहराई, कुवेत, मलेसिया र दक्षिण कोरिया लगायतका नेपाली श्रमिकहरु रहेका देशका सरकारसँग नेपाली श्रमिकहरूको भिसा, उपचार, खाद्यन्न तथा आवासको ब्यवस्था सम्बन्धित देशले गर्ने सहमती नेपाल सरकारले गरेको भन्दै जिफन्टले त्यसको स्वागत गरेको छ ।

लकडाउनबाट नै नेपाली सुरक्षित भएको भन्दै त्यसको पूर्ण पालना गरी आफु, आफ्ना परिवार तथा सबै मानिसलाई कोरोना भाईरसको संक्रमणबाट बचाउन जिफन्टले आग्रह गरेको छ । यसैगरी उच्च जोखिमकाबीच कोरोना भाईरसको विरुद्ध दिनरात खटिईरहेका चिकित्सक, स्वास्थ्य परिचारिका, श्रमिक, सुरक्षाकर्मी, जिफन्टका सदस्यहरू तथ जनचेतना जागृत गर्ने सञ्चारकर्मीहरूप्रति जिफन्टले धन्यवाद ज्ञापन गरेको छ ।

यो पनि पढ्नुहोस् कोरोनाका कारण विश्वमा २८ नेपालीको मृत्यु, करिब १२ सय संक्रमित