युएईले कोरोना भाइरस नियन्त्रणका लागि जारी गरिएको नियम विपरित काम गरेको पाइएमा ५० हजार दिरामसम्म जरिवाना गर्ने भएको छ । युएईको मन्त्रीपरिषदले यस्तो नियम गत विहिवार पारित गरेको हो ।

घरमै बस्नुपर्ने, निश्चित दुरी (कम्तीमा एक मिटर) कायम गर्नुपर्ने जस्ता नियम उल्लंघन गरेको पाइएमा त्यस्ता उल्लंघनकर्तालाई जरिवाना हुने समाचारमा जनाइएको छ । यसैगरी विनाकारण बाहिर हिंडेको पाइएमा २ हजार दिराम जरिवाना हुनेछ ।

यसैवीच युएईमा थप दुईजना नेपालीमा कोरोना भाइरसको संक्रमण पाइएको छ । गल्फ न्यूजका अनुसार पछिल्लो २४ घण्टा भित्र थपिएका ७२ नयाँ विरामी मध्ये दुईजना नेपाली हुन् । तीनजना कोरोना संक्रमणबाट निको भएका छन् । निको हुने मध्ये एक पाकिस्तानी नागरिक हुन् भनें दुईजना बंगलादेशी । युएईमा हालसम्म ४ सय ५ जनामा कोरोनाको संक्रमण देखिएको छ ।