काठमाडौं, संयुक्त अरव ईमिरेट्स (युएई) स्थित नेपाली दूतावासले युएईमा हालका दिनमा नेपालीहरुले मादक पदार्थ सेवन गरी झैझगडा गर्ने प्रबृत्ति बढेको भन्दै यसमा सजग रहन अपिल गरेको छ । दूतावासले विज्ञप्ती प्रकाशित गरी मादक पदार्थ सेवन गरी नेपाली दूतावास परिसर बाहिर हुल हुज्जत गर्ने, अराजक व्यवहार गर्ने र दूतावासको सुरक्षामा तैनाथ रहेका सुरक्षाकर्मीहरुलाई अपशब्द प्रयोग गरी गाली गर्ने गरिएको जनाएको छ ।

यस्तो गर्नेहरुलाई ड्यूटीमा खटिएका सुरक्षाकर्मीको सूचनाका आधारमा युएईको प्रहरीले कारवाही गर्ने गरेको भन्दै दूतावासले युएईको कानुन, नियम र मूल्य मान्यताको पूर्ण पालना गर्न आग्रह गरेको छ ।

दूतावासले युएईमा रहेका सवै नेपालीलाई नेपालको सद्भावना राजदूतका रुपमा रहने भएकाले आफू रहे बसेको र काम गर्ने स्थानमा सभ्य व्यवहार गर्न अनुरोध पनि गरेको छ ।