सांसद ज्ञानेन्द्रबहादुर कार्कीले वैदेशिक रोजगारीको क्रममा विदेश गएका र विभिन्न कसुरमा जेल परेका नेपालीको रिहाइको पहल थाल्न सरकारसँग माग गरेका छन् । प्रतिनिधिसभाको मंगलवारको बैठकमा बोल्दै सांसद कार्कीले हाल विदेशका विभिन्न जेलमा एक हजारभन्दा धेरै नेपालीहरू रहेको बताए । उनले तिनिहरुको रिहाइ, उद्धार र स्वदेश फिर्ताका लागि पहल गर्न पनि उनले माग गरे ।

उनले अहिले पनि विभिन्न बहानामा विदेशका जेलमा एक हजारभन्दा धेरै नेपालीहरू रहेको र उनीहरूको उद्धार र रिहाइका लागि सरकारको ध्यानाकर्षण गराउन चाहेको बताए । उनले वैदेशिक रोजगारीका लागि विदेशमा पुगेकाहरूलाई सुरक्षित बातावरणमा काम गर्ने वातावरण बनाउनका लागि पहल गर्नसमेत माग गरे ।

‘हाम्रो मुलुकको अर्थतन्त्रमा वैदेशिक रोजगारीमा गएका नेपालीहरूको महत्त्वपूर्ण योगदान छ । गतवर्षको रेमिट्यान्सलाई हेर्ने हो भने पनि १० खर्ब भन्दा धेरै रकम भित्रिएको छ,’ सांसद कार्कीले भने, ‘तर वैदेशिक रोजगारीमा पुगेका नेपालीहरूले सहज रुपमा काम गर्ने वातावरण सुनिश्चित छैन ।’