मलेसियामा विदेशी श्रमिकलाई राम्रो आवास सुविधा नदिने रोजगारदाताको नयाँ श्रमिक ल्याउने मागपत्र स्वीकृति नभएको त्यहाँका मानव संशाधन मन्त्रीले बताएका छन् । उनले उचित आवासस्थल नदिने र कालोसूचिमा परेका रोजगारदाताहरुले विदेशी श्रमिक ल्याउने गरी दिएको आवेदन स्वीकृति नभएको बताएका हुन् ।

मलेसियाको सरकारी सञ्चार माध्यम बर्नमाका अनुसार गत वर्ष विदेशी श्रमिक ल्याउन प्राप्त १६ लाख आवेदन मध्ये ४३ प्रतिशत आवेदन स्वीकृती मानव संशाधन मन्त्रालयले दिएको थियो । सन् २०२२ मा ६ लाख ७६ हजार विदेशी श्रमिक ल्याउन स्वीकृति दिइएको मन्त्रालयलाई उधृत गर्दै बर्नमाले जनाएको छ ।

मानव संशाधन मन्त्री भी शिवकुमारका अनुसार विदेशी श्रमिकलाई उचित आवास सुविधा नदिने रोजगारदाताहरुले थप श्रमिक ल्याउन पाउने छैनन् । हामीलाई अरुले निगरानी गरिरहेका छन्, मन्त्री शिवकुमारले भनेका छन्, त्यसैले हामी यसमा सजग रहनै पर्दछ । मुलुकको प्रतिष्ठा समेत जोडिएको विषय भएका कारण यसमा ध्यान दिन पनि उनले आग्रह गरेका छन् ।

मानव संशाधन मन्त्रालयका अनुसार मलेसियामा हाल १४ लाख विदेशी श्रमिक वैधानिक रुपमा कार्यरत छन् । सन् २०२३ को पहिलो चार महिना भित्रमा मलेसियामा विदेशी श्रमिकको संख्या १९ लाख पुग्ने अनुमान गरिएको छ ।