नेपाल ट्रेड यूनियन महासंघ (जिफन्ट) ले आगामी चार बर्ष भित्रमा २० लाख श्रमिकलाई सामाजिक सुरक्षा कोषमा आवद्द गराउने लक्ष्य सहित देशव्यापी अभियान सञ्चालन गर्ने घोषणा गरेको छ । वैदेशिक रोजगारीमा रहेकाहरु, सवै प्रकृतिको ज्याला रोजगारी र स्वरोजगारीमा रहेका श्रमिकहरु गरी २० लाख श्रमिकलाई कोषमा जोड्न सकिने जिफन्टको ठहर छ । यसका लागि लक्ष्य २० लाख (टार्गेट २ मिलियन) अभियान सञ्चालन गर्ने जिफन्टको योजना छ ।

जिफन्टको आठौं राष्ट्रिय महाधिवेशनले पारीत गरेको आगामी चार बर्षको कार्यक्रम प्रस्तुत गर्दै नवनिर्वाचित अध्यक्ष विनोद श्रेष्ठले स्वास्थ्य बिमाको प्रचार गर्ने, उपचारमा सहयोग गर्ने र प्रिमियम संकलनमा हस्तक्षेप गर्ने योजना पनि बनाएको जानकारी दिए ।

यसैगरी जिफन्टले विभिन्न कलेजका विद्यार्थीहरुलाई होटल, चेन रेष्टुराँ र मार्टहरुमा तालिमेका नाममा शुल्क लिएर ईन्टर्नशिप गराइने गरेको भन्दै यो अन्यायपूर्ण काम भएकाले त्यसरी काम गर्नेहरुलाई तलव दिलाउने अभियान पनि चलाउने निर्णय गरेको छ । तालिमेलाई तलव नामको सो अभियान हाल भइरहेको किशोर श्रम शोषण रोक्न श्रम ऐनको प्रावधान अनुसार अभियान सञ्चालन गरिने अध्यक्ष श्रेष्ठले बताए ।

ज्याला रोजगारीलाई मर्यादित बनाउने, श्रम अडिट कार्यान्वयन गर्न दवाव सिर्जना गर्ने लगायतका अभियानहरु प्नि सञ्चालन गर्ने जिफन्टले जनाएको छ । यसैगरी पालिका तहमा श्रमिक पञ्जिकरणका लागि पनि तिव्रता दिने जिफन्टले कार्यक्रम पारीत गरेको छ ।

वैदेशिक रोजगारमा रहेका नेपाली श्रमिकलाई अन्यायमा पर्न नदिन सीमा पारीको समस्या: संगठन र सफलता भन्ने कार्यक्रम पनि जिफन्टले सञ्चालन गर्नेछ । युवा र महिलालाई ट्रेड यूनियन आन्दोलनमा जोड्न पनि अभियानहरु नै सञ्चालन गरिने अध्यक्ष श्रेष्ठले जानकारी दिए ।

यसैबीच जिफन्टको काठमाडौंमा सम्पन्न भएको आठौं राष्ट्रिय महाधिवेशनले विनोद श्रेष्ठको अध्यक्षतामा नयाँ राष्ट्रिय कमिटी चयन गरेको छ । अधिवेशनले उपाध्यक्षहरुमा विदुर कार्की, जनक चौधरी, जितेन्द्र श्रेष्ठ, कमल गौतम, मञ्जु कुमारी थापा मगर र सीता लामा चयन गरेको छ । महासचिवमा लक्ष्मण शर्मा चयन भएका छन् । उपमहासचिवहरुमा नरनाथ लुईंटेल र पदेन उपमहासचिवमा कमला तामाङ चयन भए । सचिवहरुमा हरि बहादुर कार्की, कृष्ण बहादुर केसी, स्मृति लामा, महेन्द्र लाल श्रेष्ठ, बेलीमाया घले, तारानिधि पन्त र पदेन सचिवमा विजया खड्का चयन भए ।

साउन ७ गतेदेखि १० गतेसम्म आयोजना भएको महाधिवेशनमा देशभरीका झण्डै ५ सय प्रतिनिधिहरु सहभागि थिए ।