संयुक्त अरव ईमिरेट्स (युएई) मा आकर्षक रोजगारीमा पठाउने भन्दै विभिन्न व्यक्तिलाई डेढ करोड भन्दा बढी ठगेको अभियोगमा दुईवटा मेनपावर कम्पनी विरुद्द मुद्दा दायर भएको छ । वैदेशिक रोजगार विभागले ३९ जना व्यक्तिलाई ठगेको अभियोगमा द रोयल गोर्खा ओभरसिज तथा एक्टिभ इम्प्लोई सर्भिसेजका सञ्चालक तथा सो घटनामा संलग्नहरु विरुद्द मुद्दा दायर गरेको हो ।

विभागका निर्देशक कृष्ण प्रसाद भुसालका अनुसार द रोयल गोर्खा ओभरसिजका सञ्चालक कमल बिक समेतले ३६ जना व्यक्तिलाई युएईमा आकर्षक तलव हुने रोजगारीमा पठाउने भन्दै प्रतिव्यक्ति ८ लाखसम्म असुलेको देखिएको छ । विभागको अनुसन्धानमा सो मेनपावर कम्पनीका सञ्चालक लगायतले अम्र्स गार्ड, डीपिएस सेक्यूरिटी गार्डमा रोजगारी लगाइदिने भन्दै पीडित व्यक्तिहरुबाट १ करोड ४३ लाख १८ हजार ५ सय ठगि गरेको ठहर भएको छ । वैदेशिक रोजगार ऐन, २०६४ अनुसार ठगिको रकममा ५० प्रतिशत थप हर्जना सहित २ करोड १४ लाख ७७ हजार ७ सय ५० रुपैंया मागदावी सहित विभागले ६ जना विरुद्द वैदेशिक रोजगार न्यायाधिकरणमा मुद्दा दायर गरेको हो ।

यसैगरी एक्टिभ इम्प्लोइ सर्भिसेज प्रालीका सञ्चालक कमल बिक सहितका व्यक्तिहरुले युएईमा नै सुरक्षा गार्डको काममा पठाउने गरी थप तीन जना व्यक्तिहरुलाई पनि ठगि गरेको अभियोगमा विभागले मुद्दा दायर गरेको छ । सो कम्पनीले तीनजनासँग गरी १४ लाख ३७ हजार ठगि गरेको विभागको निश्कर्ष छ । सो अभियोगमा विगो र हर्जना गरी २१ लाख ५५ हजार ५ सय रकम मागदावी सहित मुद्दा दायर भएको हो ।

वैदेशिक रोजगारमा हुने ठगि विरुद्द अनुसन्धान गर्ने र विभागबाट फस्र्यौट हुन नसकेका मुद्दाहरु वैदेशिक रोजगार न्यायाधिकरणमा दायर गर्नुपर्ने कानुनी व्यवस्था छ । तर सामान्यतया व्यववसायी विरुद्दका मुद्दाहरु न्यून मात्रामा मात्र न्यायाधिकरणमा दायर हुने गरेका छन ।