मलेसियामा सुरक्षा गार्डहरु रोजगारीमा पठाउने संस्थाहरुको छाता संस्था सेक्यूरिटी ईण्डष्ट्री एशोसिएसन अफ मलेसिया (पिआइकेएम) ले नेपाल बाहेक अन्य मुलुकबाट पनि सुरक्षा गार्ड ल्याउने व्यवस्था गर्न सरकारसँग माग गरेको छ । हाल मलेसियाले विदेशबाट सुरक्षा गार्डका रुपमा नेपालीलाई मात्र लिने गरेको छ ।

पिआईकेएमका अध्यक्ष रमाली युसुफले मलेसियामा सुरक्षा गार्डको अभाव चर्र्किएका कारण नेपाल बाहेक अन्य मुलुकबाट पनि सुरक्षा गार्डका रुपमा काम गर्ने श्रमिक ल्याउने व्यवस्था गर्न आवश्यक रहेको बताएका छन् । मलेसियाका सञ्चार माध्यमहरुका अनुसार उनले मलेसियामा सुरक्षा गार्डको ठूलो माग रहेको तर सो अनुरुपमा श्रमिक आपूर्तिमा कठिनाई परिरहेका बताएका छन् । उनले स्थानीय नागरिकले सुरक्षा गार्डको काममा रुचि नदेखाउने गरेका कारण विदेशी श्रमिक अत्यावश्यक रहेको बताए ।

पिआईकेएमका अध्यक्ष रमालीले नेपाल बाहेक अन्य मुलुकबाट पनि सुरक्षा गार्ड ल्याउने व्यवस्था गरे्मा त्यसले स्वस्थ प्रतिस्पर्धा हुने र दक्ष सुरक्षा गार्ड उपलव्ध हुने पनि धारणा राखेका छन् ।

सन् २०२१ को नोभेम्वरमा मलेसियाको गृह मन्त्रालयले बंगलादेश, फिलिपिन्स तथा ईण्डोनेशियाबाट पनि सुरक्षा गार्ड लिन प्रस्ताव गरेको थियो । यस विषयमा विभिन्न मन्त्रालयहरुबीच छलफल जारी रहेको गृहमन्त्री जाइनुद्दिनले बताएका थिए । मलेसियामा हाल ३० हजार नेपाली सुरक्षा गार्डको कोटा रहेकोमा १५ देखि २० हजार मात्र कार्यरत रहेको र रोजगारी सकेर स्वदेश फर्केकाहरु पुन: मलेसिया नआएको पिआईकेएमले जनाएको छ ।