साउदी अरव स्थित नेपाली दूतावासले केहि हप्ता भित्रै विद्युतिय राहदानी (ई पासपोर्ट) जारी गर्ने तयारी भइरहेको भन्दै जनवरी ३० देखि फेब्रुअरी १७ सम्मका लागि यन्त्रवाचक राहदानी(एमआरपी) नविकरण नगर्ने भएको छ । दूतावासले सुचना जारी गर्दै तत्काल अत्यावश्यक नभएमा राहदानी नविकरणका लागि आवेदन नदिन पनि अनुरोध गरेको छ ।

दूतावासद्दारा जारी सुचनामा ई पासपोर्ट बनाउने प्रकृया, आवश्यक कागजात लगायतका विषयमा केहि दिन भित्रै अर्को सुचना जारी गर्ने जनाएको छ । ई पासपोर्ट प्रणाली जडान गर्ने कार्य लगायतका अन्य तयारी गर्नुपर्ने भएका कारण एमआरपी नविकरणको काम स्थगित गरिएको जनाइएको छ ।

तत्काल साउदी ईकामा नविकरण गर्नुपर्ने अवस्था आएको र त्यसको लागि नयाँ राहदानी आवश्यक पर्ने भएमा चाहिं एमआरपी नविकरणका लागि आवेदन दिन दूतावासले सुचित गरेको छ । यस्तो अवस्था भएका नेपालीलाई दूतावासको राहदानी शाखामा काम गर्ने कर्मचारीहरुलाई ०५०००३४७८६ वा ०५७१८५७८८४ वा ०५३४३४३१९१ मा सम्पर्क गरेर अग्रिम समय लिएर मात्रै दूतावासमा आउन अनुरोध गरिएको छ । अग्रिम समय नलिई आउनेहरुको आवेदन नलिईने पनि दूतावासले जनाएको छ ।

यसैगरी साउदी अरवबाट फाईनल एक्जिटमा नेपाल आउने यात्रुहरुका लागि एकतर्फी यात्रा अनुमतिपत्र (ट्राभल डकुमेण्ट) जारी गरिने पनि जनाइएको छ ।