सरकारले कोभिड १९ को संक्रमण केहि मत्थर भएसँगै केहि मुलुकहरुबाट नियमित उडानको संख्या बृद्दि तथा केहि थप मुलुकबाट उडान सुचारु गर्ने भएको छ । गत असार ७ गतेको मन्त्रीपरिषद बैठकले केहि मुलुकमा नियमित दुई तर्फी उडान सुरु गर्ने निर्णय गरेको हो ।

सरकारको निर्णयसँगै अव कतारबाट साप्ताहिक रुपमा चार उडान हुनेछन् । त्यसमध्ये दुई उडान नेपाल वायुसेवाको हुनेछ भनें दुई उडान स्थानीय वायु सेवाको हुनेछ । यसैगरी नेपालबाट युएईको दुवईमा पनि सातामा चार उडान हुनेछ । त्यसका लागि पनि नेपाल वायुसेवाको दुई तथा संयुक्त अरव ईमिरेट्सको वायुसेवाको दुई उडान हुने तोकिएको छ ।

मलेसियामा पनि सातामा चार उडान हुनेछन् । यसका लागि नेपाल वायुसेवाका लागि दुई उडान तोकिएको छ भनें स्थानीय वायुसेवाका लागि दुई उडान तोकिएका छन् ।

साउदी अरेवियाका लागि सातामा दुई उडान तोकिएका छन् । दुवै उडान नेपाल वायुसेवाको हुनेछ । यसैगरी कुवेतका लागि पनि सातामा दुई उडान नेपाल वायुसेवाले गर्नेछ ।

काठमाडौंबाट ओमानको मस्कट तथा जापानमा नेपाल वायुसेवाकै सातामा एक-एक उडान हुनेछन् । दक्षिण कोरियाको सियोलबाट भनें दक्षिण कोरियाको वायुसेवाले नै सातामा एक उडान गर्नेछ ।

टर्कीको ईस्तानबुलमा नेपालबाट साताको दुई उडान हुनेछ । दुवै उडान टर्किस एयरलाइन्सका लागि छुट्याइएको छ । सो गन्तव्यमा यस अगाडी पनि टर्किस एयरलाइन्सले नै उडान भर्दै आएको छ ।

चीनको छेन्दु तथा काठमाडौं ग्वाङझाओमा नेपाल एयरलाइन्स तथा स्थानीय एयरलाइन्सका एक-एक गरी दुवै सेक्टरमा सातामा दुई-दुई उडान खोल्ने निर्णय मन्त्री परिषदले गरेको हो ।

ति मुलुकमा कहिले देखि उडान सुरु गर्ने भन्ने विषयमा बुधवार निर्णय हुन सक्ने पर्यटन मन्त्रालय श्रोतले जनाएको छ । नियमित दुईतर्फी उडानको व्यवस्था मिलाउने जिम्मेवारी मन्त्रीपरिषदले पर्यटन मन्त्रालयलाई दिएको छ ।