कोभिड १९ का कारण विदेशमा अलपत्र परेर स्वदेश फर्किने पर्खाईमा रहेका नेपालीलाई स्वदेश फिर्ता गर्ने उच्चस्तरीय समितिको कार्ययोजना मन्त्रिपरिषदले स्वीकृत गरेको छ । शनिवार साँझ बसेको मन्त्रिपरिषद बैठकले सो कार्ययोजना स्वीकृत गरेको हो । कार्ययोजना स्वीकृत भएसँगै अव नेपालीलाई स्वदेश फर्काउने बाटो खुलेको छ ।

सरकारले गैरकानूनी हैसितमा रहेर गन्तव्य मुलुकका घरफिर्ति केन्द्रमा रहेकाहरु, विदेशमा रहेका नेपाली कुटनीतिक नियोगमा निवेदन दिएका मध्ये रोजगारी गुमेकाहरु, आफन्तको मृत्यु भएका कारण स्वदेश फर्किने पर्खाइमा रहेकाहरु लगायतलाई पहिलो चरणमा स्वदेश फर्काउने तयारी गरेको हो । यसरी फर्काउने काम एक साता देखि १० दिनभित्रमा सुरु हुने अपेक्षा गरिएको छ ।
यसैबीच विदेशस्थित नेपाली फर्काउन गैर आवासिय नेपाली संघ (एनआरएनए) ले सरकारलाई सघाउने भएको छ । सरकारले विदेशमा समस्यामा परेका नेपालीलाई स्वदेश फर्काउन गरेको निर्णयलाई स्वागत गर्दै संघले यस्तो निर्णय गरेको हो ।