चीनपछि सवैभन्दा धेरै कोरोना भाइरसको संक्रमित देखिएको मुलुक दक्षिण कोरियाबाट नेपाल आउने सवै यात्रुको अव विमानस्थलमा नै स्वास्थ्य परिक्षण सहितको विवरण लिइने भएको छ । दैनिक रुपमा २ सयको हाराहारीमा दक्षिण कोरियाबाट यात्रु त्रिभुवन विमानस्थल हुँदै नेपाल भित्रिने गरेका छन् । तसर्थ त्रिभुवन अन्तर्राष्ट्रिय विमानस्थलस्थित आपत्कालीन हेल्थ डेस्कलाई सो मुलुकबाट आउनेहरुको अनिवार्य स्वास्थ्य परिक्षण सहितको विवरण लिन निर्देशन दिइएको हो ।

परिक्षणका क्रममा कुनै शंका लागेमा आइसोलेसनका लागि अस्पतालमा रिफर गर्न स्वास्थ्य मन्त्रालयले स्वास्थ्यकर्मीलाई निर्देशन दिएको छ । स्वास्थ्य मन्त्रालयअन्तर्गतको इपिडिमियोलोजी तथा रोग नियन्त्रण महाशाखामा आइतबार बसेको आकस्मिक बैठकले कोरियाबाट आउने सबैको स्वास्थ्य परीक्षण अनिवार्य गरेको हो । यसअघि चीनको वुहानबाट आएका नागरिकको मात्रै स्वास्थ्य परीक्षण हुँदै आएको थियो ।

महाशाखाका वरिष्ठ मेडिकल सुपरिटेन्डेन्ट डाक्टर हेमन्त ओझाले जोेखिमलाई मध्यनजर गर्दै कोरियाबाट आउने सबैको स्वास्थ्य परीक्षण अनिवार्य गर्ने निर्णय भएको बताए ।

यसैबीच दक्षिण कोरियामा कोरोना भाइरसका विरामीको संख्या बढेपछि केहि समयका लागि नेपाली श्रमिक त्यहाँ पठाउन स्थगित हुन सक्ने भएको छ । ईपिएस कोरिया शाखाका अनुसार कोरोनाको समस्याका विषयमा गम्भीरतापूर्वक दुवै देशले हेरिरहेको र केहि समयका लागि श्रमिक पठाउन स्थगित हुन सक्ने छ । यहि हप्ता जानु पर्ने झण्डै २ सय नेपाली दक्षिण कोरियाले तत्काल नलैजान चाहेका कारण उनीहरुको उडान रोकिइसकेको छ । आगामी हप्ताका लागि उडान तोकिएका नेपाली श्रमिकको पनि अनुमति आउने वा नआउने भन्ने ईपिएस शाखालाई यकिन छैन ।

ईपिएस कोरिया शाखा प्रमुख कृष्ण खनालका अनुसार आगामी फागुन १८ गतेसम्म कोरियाका लागि उडान छैन । सो दिनका लागि नेपालले ४० जनाको नाम उडानका लागि यसअघि पठाएको छ । ति नामहरु दक्षिण कोरियाबाट नै स्वीकृत भएर आउनु पर्दछ । पक्कै पनि दक्षिण कोरियाले पनि यो विषयलाई गम्भीरतापूर्वक हेरिरहेकै हुनु पर्दछ, हामी पनि यसमा गम्भीर छौं खनालले भने कोरोना भाइरसको समस्याका कारण केहि समयलाई श्रमिक पठाउने कुरा स्थगित हुन सक्छ । दक्षिण कोरियामा कोरोना भाइरसका विरामीको संख्या ४ सय नाघिसकेको छ ।