![कतारमा अव रोजगारदाता फेर्न पाइने, न्यूनतम तलव तोकियो](https://deshparadesh.com/wp-content/uploads/2015/09/qatar_photo.jpg)
काठमाडौं, असोज ३०-
कतारले कफाला प्रणालीको विधिवत अन्त्य गर्दै रोजगारदाता फेर्न पाइने कानुन अगाडी सारेको छ । कतारको मन्त्रीपरिषदले पारीत गरेको नयाँ कानुन अनुसार अव रोजगारदाता परिवर्तन गर्न सुरुवाती रोजगारदाताको नो अव्जेक्सन लेटर पनि नचाहिने भएको हो ।
कतारको नयाँ कानुनले सुरक्षा निकायबाहेकका कामदारलाई रोजगारदाता फेर्न नो अव्जेक्सन लेटर हटाएसँगै अव कतारमा कफालाको विधिवत अन्त्य भएको अन्तराष्ट्रि श्रम संगठन(आइएलओ) ले जनाएको छ । यसैगरी कतारले मध्यपूर्वमा नैै पहिलो मुलुकका रुपमा न्यूनतम ज्याला तोकेको पनि जनाएको छ । तर न्यूनतम ज्याला कति तोकिएको हो भन्ने हालसम्म कतारले सार्वजनिक गरिसकेको छैन ।
“आईएलओ नयाँ सुधारको स्वागत गर्दछ र श्रम क्षेत्र रुपान्तरणका लागि कतार सरकारले गरेको प्रतिवद्धताको सम्मान गर्दछ” आइएलओले भनेको छ । कतारको पछिल्लो कदमले आप्रवासी कामदारको अधिकारलाई सुरक्षित गर्ने र यसले मुलुकको उत्पादकत्व पनि वृद्धि हुने आइएलओको भनाई छ । आइएलओका महानिर्देशक गाई राईडरले आइएलओको कतार स्थीत कार्यालयले यसमा आवश्यक सहयोग गर्ने बताएका छन् ।
कतारले रोजगारदाता परिवर्तन गर्न पहिलेजस्तो एनओसी लिन नपर्ने व्यवस्थाले कामदारलाई सहजता हुने विश्वास गरिएको छ । अव त्यसरी कुनै रोजगारदातासँग कार्यरत कामदार लिनु पर्ने भएमा पुरानो रोजगारदाताले कामदारको भर्ना खर्च वापत तिरेको सुरुवाती रकम नयाँ रोजगारदाताले तिर्नुपर्नेछ ।
सन् २०२२ मा विश्वकप फुटवल प्रतियोगिता आयोजना गर्न गइरहेको कतारमा श्रमिकको अधिकार रक्षाका लागि काम गर्न आइटीयूसीले लगातार दवावमुलक काम गर्दै आएको छ । फलस्वरुप कतारमा श्रम क्षेत्र सुधारका पक्षमा पछिल्ला केहि समययता धेरै नीतिगत व्यवस्था गरिएका छन् । पछिल्लो व्यवस्था त्यसैको निरन्तरता हो ।
यो पनि पढ्नुहोस् कतारमा दूतावास बलियो की एजेण्ट ?