काठमाडौं, भदौ ४-

संसदिय समितिले वैधानिक रुपमा घरेलु काममा गएका तथा तोकिएको शर्त पुरा गर्नेहरुलाई पुनः श्रम स्वीकृति दिन बाटो खोलेको छ । संसदको उद्योग तथा वाणिज्य र श्रम तथा उपभोक्ता हित समितिको बुधवारको बैठकले यस्तो निर्णय गरेको हो । यसले विगत लामो समयदेखि रोकिएको घरेलु कामदारको पुनः श्रम स्वीकृति खोल्न सरकारलाई सहज भएको छ ।

समितिले सम्बन्धित घरेलु कामदारले आफू ‘सुरक्षित’ रहेको स्वघोषणा पत्र बनाएको र उ कार्यरत मुलुकमा रहेको नेपाली दूतावासले पनि श्रम इजाजत नवीकरण गर्न सिफरिस गरेको कागजातका आधारमा श्रम स्वीकृति नवीकरण गर्न दिने निर्णय गरेको हो ।

समितिको निर्णय पश्चात अव सरकारले यसअघि लगाइएको प्रतिवन्ध खुल्ला गरेपछि तोकिएको शर्त पुरा गरेका घरेलु कामदारले पुनः श्रमस्वीकृति पाउनेछन् । यस सोमवार मात्र सर्वोच्च अदालतले पुनः श्रम स्वीकृति खुल्ला गर्न किन अन्तरिम आदेश नदिने भन्ने विषयमा श्रम, रोजगार तथा सामाजिक सुरक्षा मन्त्रालय, संसदीय समिति लगायतका नाममा कारण आदेश जारी गरेको थियो ।

तर वुधवारको संसदीय समितिको वैठकले नयाँ जानेहरुको हकमा भनें कुनै निर्णय गरेको छैन । तसर्थ घरेलु काममा नयाँ जान चाहनेहरुले भनें यहि निर्णयका आधारमा कुनै फेरवदल हुनेछैन ।