काठमाडौं, असार ९-

बैदेशिक रोजगारका लागि गएर श्रम स्वीकृति अवधि भित्रै विरामी भर्ई नेपाल फर्केको अवस्थामा उपचारका क्रममा मृत्यु भएका व्यक्तिका परिवारले सरकारले दिंदै आएको क्षतिपूर्ति (राहत) रकम पाउने भएका छन् । आइतवार बसेको बैदेशिक रोजगार बोर्डको बैठकले श्रम स्वीकृतिको अवधि भित्रै नेपालमा मृत्यु भएकाहरुलाई क्षतिपूर्ति (राहत) उपलव्ध गराउने निर्णय गरेको हो ।

विगत लामो समयदेखि अलमलमा रहेको सो विषयमा निर्णय भएसँगै १ सय १४ परिवार यसबाट लाभान्वित हुने भएका छन् । ति परिवारले दिएको निवेदन बैदेशिक रोजगार बोर्डमा एक बर्षभन्दा लामो समयदेखि निर्णय हुन नसक्दा उनीहरु राहत रकम पाउनबाट वञ्चित थिए । अव उनीहरुले बैदेशिक रोजगार बोर्ड मार्फत सरकारले उपलव्ध गराउने क्षतिपूर्ति (राहत) रकम पाउने छन् । हाल बैदेशिक रोजगार बोर्डले बैदेशिक रोजगारका लागि श्रम स्वीकृति लिएका र सोही अवधिभित्र मृत्यु भएका व्यक्तिका परिवारलाई रु. ७ लाख उपलव्ध गराउँदै आएको छ । 

यसरी मृत्यु भएका व्यक्तिका परिवारलाई आर्थिक सहायता दिन बोर्डले थप ६ करोड ६६ लाख व्यवस्था गरेको  छ । यसअघि त्यसरी निवेदन दिएकाहरुको निवेदन तथा कागजात अध्ययन गर्न अघिल्लो बोर्ड बैठकले समिति गठन गरेको थियो । सो समितिको सिफारिस अनुसार नै आर्थिक सहायता उपलव्ध गराउने निर्णय भएको हो । 

यसैगरी विदेशमा कोमामा रहेका विरामीलाई नेपाल फर्काउने विषयमा पनि अध्ययन गरिने भएको छ । यसका लागि बोर्डले विशेषज्ञ सम्मिलित एक समिति गठन गर्ने निर्णय गरेको छ । बैठकमा सहभागि अधिवक्ता निशा बानियाँले विदेशका अस्पतालमा हाल २८ जना नेपाली कोमामा रहेको  र उनीहरुलाई स्वदेश ल्याउनु मानविय कर्तव्य भएको धारणा राखेको बताइन् । उनले २८ जना मध्ये आधाजसोलाई थेरापी गरेर राख्न सकिने र बाँकी आधाको विषयमा नेपालको अस्पतालहरुमा सुविधा थपेर व्यवस्था गर्नुपर्ने बताइन् । सो विषयमा नेपालमा ल्याउने सम्भाव्यताका विषयमा अध्ययन गरी रायसल्लाह दिन श्रम, रोजगार तथा सामाजिक सुरक्षा मन्त्रालयको बैदेशि रोजगार  महाशाखा प्रमुखको संयोजकत्वमा चिकित्सकहरु समेत सम्मिलित समिति बनाइएको छ ।