काठमाडौं, जेठ ६-

बैदेशिक रोजगार बोर्डले बैदेशिक रोजगारबाट फर्केर स्वदेशमा नै उद्यम गर्न ईच्छुक व्यक्तिहरुलाई सहज रुपमा ऋण प्रवाह गर्न बाणिज्य बैंकहरुलाई आग्रह गरेको छ । बोर्डले बैंकका प्रतिनिधिहरुसँगको छलफलमा कार्यविधिमा देखिएका समस्या समाधानका लागि सम्वन्धित निकायसँग पहल भइरहेको भन्दै स्वदेशमा नै उद्यम गर्न ईच्छुकहरुलाई ऋण दिन आग्रह गरेको छ ।

बोर्डका कार्यकारी निर्देशक राजन श्रेष्ठले बैदेशिक रोजगारबाट फर्केका व्यक्तिलाई सवै मिलेर स्वदेशमा नै गरिखाने वातावरण निर्माण गर्न आवश्यक भएको धारणा राखे । उनले बैंकहरुले गर्ने ऋण प्रवाहले त्यस्ता व्यक्तिलाई स्वरोजगार बन्न र स्वदेशमा नै उद्यम गर्न बाटो सहज बनाउने भन्दै त्यसका लागि बोर्डका तर्फबाट आवश्यक सहयोग गरिने जनाए । उनले बैदेशिक रोजगार बोर्डमा यसअघि सुचिकृत भएका १८ हजार ७ सय ३७ व्यक्तिको विवरण बैंकहरुलाई उपलव्ध गराइने भन्दै उनीहरुलाई परियोजना प्रस्ताव हेरेर उपयुक्तलाई ऋण उपलव्ध गराउन आग्रह गरे ।

राज्यले बनाएको नीतिलाई कार्यान्वयनमा लैजाने भनेको सवै मिलेर नै हो भन्दै कार्यकारी निर्देशक श्रेष्ठले बोर्डको दायित्व बैदेशिक रोजगारबाट फर्केकाहरुलाई सामाजिक, आर्थिक पुनरएकिकरण गर्ने भएको र सहुलियत व्याजदरको ऋणले त्यसमा सघाउने धारणा राखे । बैदेशिक रोजगार बोर्डले आगामी साउनदेखि पुनरएकिकरणको कार्यक्रम सञ्चालन गर्ने तयारी बैदेशिक रोजगार बोर्डले गरिरहेको भन्दै त्यसका लागि पनि हाल संकलित बैदेशिक रोजगारबाट फर्केकाहरुको तथ्याँकले सघाउने बताए ।

छलफलमा कृषि विकास बैंकका बाबुकाजी थापाले बैंकले सो प्रकतिको ऋण दिन थालिसकेको र हाल पनि थुप्रै निवेदन प्रकृयामा रहेको भन्दै ऋण लिन चाहनेहरुका लागि वित्तिय साक्षरताको तालिम आवश्यक रहेको धारणा राखे । 

नेपाल बंगलादेश बैंकका सहायक प्रवन्धक प्रविन कुमार नेपालले आफ्नो बैंकले केहि व्यक्तिलाई ऋण प्रवाह गरिसकेको भन्दै तर यसमा केहि समस्या रहेको औंल्याए । उनले ऋण लिन आउने व्यक्तिहरुले व्यक्तिगत विवरण सकेसम्म  लुकाउन खोेज्ने भन्दै यसले बैैंकलाई थप सशंकित बनाएको बताए ।

सेञ्चुरी बैंकका रिटेल बैंकिङ म्यानेजर दीपेन्द्र विष्टले बैदेशिक रोजगारबाट फर्केकाहरुका लागि लगानी गरिने ऋण बीचमै ऋणीले किस्ता तिर्न छोडेमा सो रकम बीमा मार्फत फिर्ता लिन साढे ५ बर्ष पर्खिनुपर्ने व्यवस्था अव्यवहारिक भएको बताए । उनले बैंकहरुले लामो समयसम्म खराव कर्जा राख्न नचाहने भन्दै कार्यविधिमा यसलार्ई सच्याएर किस्ता उठ्न छोडेको ६ महिनाभित्रमा बीमा मार्फत रकम फिर्ता हुने व्यवस्था गर्न जरुरी रहेको  औंल्याए । हाल सहुलियत व्याज सहितको कर्जा सम्वन्धि निर्देशिकामा ५ बर्षका लागि दिइने त्यस्तो ऋण नउठेको खण्डमा समयावधि(५ बर्ष) पुरा भएको ६ महिनापछि बीमा मार्फत निश्चित रकम बैंकले फिर्ता पाउने प्रावधान छ ।

वित्तिय साक्षरता तालिमको तयारी

बैदेशिक रोजगार बोर्डले बैदेशिक रोजगारबाट फर्केकाहरुलाई वित्तिय साक्षरताको तालिम दिने तयारी थालेको छ । ऋण लिन चाहनेहरुमा परियोजना लेखन, आर्थिक योजना लगायतका विषयमा ज्ञानको अभाव देखिएको भन्दै बोर्डले त्यसको तयारी थालेको हो । पहिलो चरणमा काठमाडौंमा १ हजार व्यक्तिका लागि त्यस्तो कक्षा चलाउने तयारी भएको बोर्डले जनाएको छ । यसका लागि दैनिक १ सय जना सहभागि हुनेगरी परिक्षणका रुपमा १०-१२ वटा कक्षा सञ्चालन गर्ने तयारी भएको बोर्डका कार्यकारी निर्देशक श्रेष्ठले जानकारी दिए । उनले परिक्षण तालिमको प्रभावकारीताका आधारमा अन्य प्रदेशहरुमा पनि तालिम सञ्चालन गरिने बताए । उनले यस्तो तालिममा यसअघि बोर्डमा सुचिकृत भएकाहरुलाई प्राथमिकता दिइने पनि बताए ।

सुचिकरणमा निवेदन दिने सवैभन्दा धेरै प्रदेश नं ३ का

यसअघि बैदेशिक रोजगार बोर्डले गत माघमा सुचिकरणका लागि गरेको आव्हानमा सुचिकृत भएका मध्ये सवैभन्दा धेरै प्रदेश नं ३ का रहेका छन् । कुल सुचिकृत १८ हजार  ७ सय ३७ जना मध्ये प्रदेश नं ३ का १३ जिल्लाबाट १३ हजार ५ सय ३५ जना सुचिकृत भएको बोर्डले जनाएको छ । सवैभन्दा कम कर्णाली प्रदेशका ९ जिल्लाबाट २ सय ९२ जना सुचिकृत भएका छन् ।

सुचिकृतमा मलेशियाबाट फर्केका धेरै

बोर्डको सुचिकरणमा सवैभन्दा धेरै मलेशियाबाट फर्केकाहरु रहेका छन् । सो सुचिमा मलेशियाबाट फर्केकाहरुको संख्या ६ हजार ४ सय ८ रहेको छ । दोश्रोमा साउदी अरवबाट फर्केकाहरुको संख्या ४ हजार ३ सय ९२ रहेको छ । यसैगरी तेश्रोमा कतारबाट फर्केकाहरुको संख्या ३ हजार ६ सय ७ रहेका छन् भनें चौथोमा युएईबाट फर्केकाहरुको संख्या २ हजार ६ सय १७ रहेको छ ।

उद्योग व्यवसायको रुचि धेरै

आवेदन दिने मध्ये धेरैको रुचि उद्योग, व्यवसायमा देखिएको छ । सुचिकृत मध्ये ४ हजार ७ सय ४० जनाले उद्योग व्यवसाय गर्ने रुचि राखेका छन् भनें यातायात व्यवसाय गर्न चाहनेहरुको संख्या ३ हजार ७ सय १० रहेको छ । त्यसपछि कुखुरा पालन गर्न चाहनेहरु रहेका छन् जसको संख्या २ हजार ८ सय ८९ रहेको छ । यसैगरी २ हजार ६ सय ३२ जनाले पशुपालन, २ हजार ४२ जनाले होटल व्यवसाय, तथा २ हजार २२ जनाले कृषिमा रुचि देखाएका छन् ।

यसमध्ये उपयुक्त देखिएका आवेदनकर्ताहरुलाई सहज रुपमा ऋण लगानी गर्न आग्रह गर्दै बोर्डले सुचिकृतहरुको सुचि बोर्डको वेभसाइट मा राख्ने र आवश्यक परेमा थप विवरण बैंकहरुलाई उपलव्ध गराउने जनाएको छ ।