झापा, बैशाख २४-

सरकारले गत साउनमा बृद्धि गरेको न्यूनतम ज्याला कार्यान्वयनको माग राख्दै झापामा आन्दोलनरत चिया बगान क्षेत्रमा कार्यरत श्रमिकले मंगलवार झापाको बिर्तामोडमा सडकमै सुतेर विरोध प्रदर्शन गरेका छन् । आन्दोलन सुरु भएको ३८ औं दिनसम्म पनि श्रमिकका माग समाधान नभएपछि उनीहरु बिर्तामोडको मुक्ति चोकमा दिउँसोको प्रचण्ड गर्मीका बीच दिउँसो १ देखि २ बजेसम्म सडकमा सुतेका थिए ।

सरकारले गत साउनमा चिया वगानमा काम गर्ने श्रमिकको दैनिक ज्याला ३ सय ८५ तोकेको थियो । यसअघि श्रमिकले दैनिक २ सय ७८ रुपैंयाँ पाउँदै आएका थिए । सरकारले न्यूनतम ज्याला बृद्धिको निर्णय गरेपनि उद्योगिहरुले भनें त्यसलाई पालना नगरी पुरानै ज्याला दिइरहेपछि श्रमिक आन्दोलित भएका हुन् । गत भदौयता पटक पटक आन्दोलनमा उत्रेका चिया श्रमिक गत साउन १७ यता निरन्तर आन्दोलनमा छन् । जतिपटक आन्दोलन गरेपनि चिया उद्योगीले माग सुनुवाई नगरेपछि श्रमिक अनिश्चितकालिन आन्दोलनमा उत्रिएका हुन् ।

झापा, ईलाम, धनकुटा लगायतका विभिन्न जिल्लाका चिया वगानमा गरी झण्डै ५३ हजार श्रमिक कार्यरत रहेको श्रमिक संगठनहरुको दावी छ । झापामा श्रमिक आन्दोलित भइरहँदा चिया उद्योगी भनें राजधानी काठमाडौंमा सरकारले बृद्धि गरेको न्यूनतम ज्याला लागु गर्न नसकिने भन्दै राजनीतिक दलका नेताहरु तथा मन्त्रीहरुलाई सहमत गराउन प्रयत्नरत छन् ।

यो पनि पढ्नुहोस् विदेशबाट फर्केका १ हजारलाई बर्षदिन भित्र ऋण दिने एनएमवि बैकको घोषणा, सहमतिपत्रमा हस्ताक्षर