काठमाडौं, फागुन ८-

कन्सुलर सेवा विभागले बैदेशिक रोजगारमा रहेकाहरुको समस्यालाई सहज रुपमा समाधान गर्न नेपाल कन्सुलर मोवाइल एप सुरु गरेको छ । कुनै समस्या भएमा अव मोवाईल मार्फत नै गुनासो दर्ता गर्न सकिने भएको हो ।

सो एपको शुभारम्भ गर्दै परराष्ट्रमन्त्री प्रदीप ज्ञवालीले मानविय संवेदना जोडिएको विषयमा काम गर्ने कन्सुलर सेवा विभागले आफ्नो कामलाई अझ चुस्त बनाउन प्रविधि मार्फत गर्न खोजेको प्रयास सकारात्मक रहेको बताए । उनले यसले सरकारी कर्मचारीलार्ई पनि जवाफदेही र उत्तरदायी बनाउने धारणा राखे ।

पराराष्ट्रमन्त्री ज्ञवालीले सरकारको प्रयत्नका वावजुद बैदेशिक रोजगारलाई सुरक्षित बनाउन अझै नसकिएको भन्दै हाल पनि विचौलियाले रोजगारीको खोजिमा रहेकाहरुलाई शोषण गरिरहेको बताए । आफन्तको विदेशमा मृत्यु भएमा कहिले लाश आइपुग्छ भनेर पर्खेर बस्नुु अत्यन्तै पीडादायी क्षण हुने भन्दै मन्त्री ज्ञवालीले यस्तो प्रविधिले त्यो समस्यालाई छिटो समाधान गर्न सघाउने विश्वास व्यक्त गरे ।

बाध्यताको बैदेशिक रोजगारलाई अन्त्य गर्दै स्वदेशमा नै रोजगारी सिर्जना गर्न वर्तमान सरकारले प्रधानमन्त्री रोजगार कार्यक्रम सुरु गरेको भन्दै मन्त्री ज्ञवालीले तर बैदेशिक रोजगार रातारात अन्त्य नहुने धारणा राखे । उनले बैदेशिक रोजगारमा जाँदा पनि तुलनात्मक रुपमा मर्यादित काम भएका र कमाई पनि उचित हुने मुलुकमा नेपाली जाने वातावरण निर्माण गर्न जापान लगायतका मुलुकसँग छलफल चलिरहेको र अन्य मुलुकमा पनि श्रम सम्झौता सरकारको प्राथमिकतामा रहेको बताए ।

सो अवसरमा बोल्दै कन्सुलर सेवा विभागका महानिर्देशक गेहेन्द्र राजभण्डारीले विदेशमा भएका नेपालीलाई सेवा दिनु आफ्नो विभागको प्राथमिक काम भएको बताए । उनले सेवालाई अझ प्रभावकारी बनाउनु आवश्यक छ भन्ने कुरालाई आत्मसाथ गर्दै विभागले नयाँ प्रविधिको प्रयोग सुरु गरेको बताए । कन्सुलर सेवा विभागले दिने सेवा मध्ये शव झिकाउने, खोजतलास तथा उद्धार गर्ने, क्षतिपूर्तिको निवेदन लिने रहेको भन्दै एप मार्फत यी सवै कुराको प्रकृया आरम्भ गर्न सकिने उनको भनाई थियो । महानिर्देशक राजभण्डारीले यसले सरकारी कर्मचारीलाई जवाफदेही बनाउने भन्दै काम गरेको वा नगरेको कुरा अनलाइनमा नै देखिने भएका कारण यसले सेवालाई चुस्त बनाउने अपेक्षा प्रकट गरे । उनले कुनै समस्या परेमा आफू रहेकै ठाउँबाट एप मार्फत गुनासो दर्ता गर्न सकिने भएका कारण यसले बारम्वार दूतावास धाउनु पर्ने वा फोन गरिरहनु पर्ने अवस्थाको अन्त्य हुने धारणा राखे ।