काठमाडौं, कात्तिक १-

मलेसियामा आगामी जनवरीदेखि लागु हुनेगरी गरिएको मासिक ५० रिंगिट न्यूनतम ज्याला बृद्धिको निर्णयका विषयमा सरकारले पुनर्विचार गर्ने भएको छ । मलेसियाका मानव संशाधन मन्त्री एम कुलासेगरनले विभिन्न पक्षको असन्तुष्टिलाई मध्यनजर गर्दै न्यूनतम ज्याला बृद्धिका विषयमा यसअघि गरिएको निर्णयमा पुनर्विचार हुने बताएका हुन् ।

बुधवार मासिक ५० रिंगिट तलव बृद्धिमा असहमति जनाउँदै मलेसियन ट्रेड यूनियन कँग्रेस (एमटीयूसी) सहित विभिन्न यूनियनहरुको आव्हानमा झण्डै २ सय व्यक्तिले संसद अगाडी प्रदर्शन गरेका थिए । मलेसियाको अनलाइन द सन डेलीका अनुसार सो प्रदर्शन पश्चात ज्ञापनपत्र बुझाउन गएकाहरुसँगको भेटमा मन्त्री कुलासेगरनले यस्तो प्रतिवद्धता जनाएका हुन् ।

ज्ञापनपत्र बुझ्दै मन्त्री कुलासेगरनले त्यसलाई आफूले मन्त्री परिषद बैठकमा लैजाने र यसअघिको निर्णय पुनर्विचार हुने बताएको एमटीयूसीका महासचिव जे सोलोमनलाई उधृत गर्दै समाचारमा जनाइएको छ ।

एमटीयूसीका महासचिव सोलोमनले आफूहरुले सरकारको अन्तिम निर्णय पर्खिने र आफूहरुको माग सुनुवाई नभएमा अहिले भन्दा १० गुणा धेरै व्यक्ति सहित प्रदर्शनमा उत्रिने बताए ।

गत महिना मलेसियाको सरकारले प्रतिमहिना ५० रिंगिट तलव बृद्धिको घोषणा गरेको थियो । यसअघि निर्वाचनका समयमा भनें मलेसियाको वर्तमान सरकार निर्माण गर्न सफल गठवन्धन पक्तान हार्पनले मासिक १५ सय रिंगिट न्यूनतम तलव बनाउने प्रतिवद्धता जनाएको थियो । चुनाव अघि उचित ज्याला बृद्धिको प्रतिवद्धता जनाएको पक्तान गठवन्धनलाई एमटीयूसीले समर्थन गरेको थियो । तर चुनाव जितेर सरकार बनाएपछि सो प्रतिवद्धताबाट पछि हटेको भन्दै एमटीयूसीले सरकारको आलोचना गरेको छ ।

यो पनि पढ्नुहोस्  २८ अक्टोबर पछि कतार छोड्न खुरुज (एक्जिट पर्मिट) नचाहिने