काठमाडौं, असोज ३१-

मलेसियामा श्रमिकको मासिक न्यूनतम तलव प्रतिमहिना १ हजार ५० बनाउने सरकारको निर्णयको विरोधमा क्वालालम्पुरमा बुधवार प्रदर्शन भएको छ । संसद अगाडी भएको सो प्रदर्शनका सहभागिहरुले मासिक ५० रिंगिट बृद्धि गर्ने सरकारको निर्णयको विरोध गरेका थिए । बृद्धि हुने तलव आगामी जनवरी १ देखि लागु हुने सरकारले जनाएको छ ।

प्रदर्शनका सहभागिहरुले बोकेको प्लेकार्डमा मासिक ५० रिंगिट बृद्धि लज्जाजनक भएको लेखेका थिए । यसैगरी सरकारलाई पुरानो निर्णय परिवर्तन गर्न र उचित ज्याला बृद्धि गर्न समेत माग गरिएको प्लेकार्ड प्रदर्शन गरिएको थियो । मलेसियाको स्थानीय यूनियन अन्तर्गतको एमआरसी लगायतको सहभागितामा भएको सो प्रदर्शनका क्रममा मानव संशाधन मन्त्री एम कुलासेगरनलाई ज्ञापनपत्र समेत बुझाइएको थियो ।