प्रभातकुमार मिश्र, जनकपुर, जेठ १४-

बैदेशिक रोजगारमा काम र तलव फरक परेर फर्केका एक पीडितलाई उल्टै मेनपावर कम्पनीले नै धम्क्याइरहेको पाइएको छ । नेपालमा भने अनुसार काम र तलव नपाएपछि स्वदेश फर्केर आफ्नो रकम फिर्ता गरिदिन आग्रह गर्दा उल्टै मेनपावर कम्पनीले नै धम्की दिएको हो ।

धनुषाको क्षिरेश्वरनाथ नगरपालिका ४ हरैयाका राकेशकुमार महरा रोजगारीका क्रममा कतार गएका थिए । उनी टायल मेसनको काममा मासिक १५ सय रियाल (१२सय न्यूनतम तलव तथा ३ सय खाना खर्च) को सहमतिमा कतार गएका हुन् । तर कतार पुगेपछि आफूलाई लेवरको काममा लगाइएको र तलव पनि मासिक जम्मा ९ सय रियाल दिइएपछि डेढ महिनामा नै महरा नेपाल फर्किएका थिए । “मैले त्यहाँ दिएको  काम नै गर्न सकिन” महराले भने “मलाई नेपालमा भने अनुसारको तलव नपाएपछि म घर फर्किएँ ।”

उनी अलितक्वान मेनपावर कम्पनी मार्फत कतार पुगेका थिए । उनी काम गर्न पुगेको कम्पनीकोे नाम बी फाइभ ट्रेडिङ एण्ड कन्ट्राक्टिङ हो । महरालाई अलितकान मेनपावर कम्पनीले नै दुईवटा सम्झौता पत्र बनाएर पठाएको थियो । उनलाई सुरुमा टायल मेसनको सम्झौता पत्र दिइएको भएपनि अर्को सम्झौतापत्र लेवरको पनि दिइएको छ । बैदेशिक रोजगार ऐन अनुसार यसरी दुईवटा सम्झौतापत्र दिनु कसुर हो र यसमा पीडितलाई फरक परेको तलव बरावरको रकम क्षतिपूर्ति तिर्नुपर्ने र सरकारी जरिवाना समेत हुन्छ ।

नेपाल फर्किएपछि महराले आफूले तिरेको रकम फिर्ता गरिदिन आग्रह गर्दा उल्टै मेनपावर कम्पनीका सञ्चालकले धम्की दिएका छन् । “तँ अर्को देश जाने भए केहि हेरिदिउँला, अन्यथा जहाँ गएर जे गरेपनि केहि हुन्न” अलितक्वानका एक व्यक्तिको भनाई उध्रित गर्दै महराले भने “मैले तिरेको १ लाख फिर्ता लिन म अहिले प्रयास गरिरहेको छु ।”

उनले आफ्नो रकम फिर्ता गराइदिन जनकपुरस्थीत सुरक्षित आप्रवासन सुचना तथा परामर्श केन्द्रमा निवेदन दिएका छन् । सुचना केन्द्रको पहलमा गरिएको छलफलमा महरालाई बैदेशिक रोजगारमा पठाउने एजेण्ट श्याम यादवले ६० हजार रकम फिर्ता गर्ने सहमति जनाएपनि मेनपावर कम्पनीले भनें कुनै रकम नदिने भन्दै उल्टै धम्की दिएको हो । एजेण्ट यादवले आफूले वल्र्ड लिंक नामको मेनपावर कम्पनीमा महराको पासपोर्ट बुझाएको तर अर्को मेनपावर कम्पनीबाट कसरी महराको श्रम स्वीकृति निस्कियो भन्ने आफूलाई थाहा नभएको बताएका छन् । पीडितको निवेदनलाई अव बैदेशिक रोजगार विभागमा पठाउने तयारी सुचना केन्द्रले गरेको छ । 

यो पनि पढ्नुहोस् छोरा, आमाबाबुको मुख हेर्न भएपनि घर फर्क