काठमाडौं, जेठ ५-

विदेश पुगेका युवा काठको बाकसमा बन्द भएर फर्किनुपरेको पीडामाथि बनेको गीत ‘बोल माया’को भिडियो सार्वजनिक गरिएको छ । ललितपुरमा आयोजित कार्यक्रममा श्रम, रोजगार तथा सामाजिक सुरक्षामन्त्री गोकर्ण विष्टले गीतको भिडियो सार्वजनिक गरेका हुन् ।

प्रकाश सपुतको शब्द, संगीत र निर्देशनमा बनेको गीतमा फिल्म निर्देशक तथा गायक नारायण रायमाझीको स्वर छ । गायक रायमाझीले नेपाली समाजको सत्य कथालाई गीतबाट मार्मिक ढंगले प्रस्तुत गरिएको बताए ।

नारायणलाई स्वरमा शान्तिश्री परियार र प्रकाशले पनि साथ दिएका छन् । मन्त्री विष्टले आफू भावुक व्यक्ति भएकाले गीतले निदाउन नदिने प्रतिक्रिया दिए । ‘गीतमा समेटिएको यथार्थ मैले देखेको छु । यही दुःखद दिन दूर गर्न हामी अहिले लागिपरेका छौँ,’ उनले भने । नयाँ पत्रिकाबाट