निर्वाचन राई, काठमाडौं-

रोजगारीको शिलशिलामा विदेशमा लामो समयसम्म हामीले काम गर्यौं । त्यसबाट हामीले के अनुभव गर्यौं भनें विदेशमा हामीले दुःख गरेर कमाएको पैसालाई मात्र नेपालमा हेरिन्छ । नेपाली युवा विदेश जाने भनेको नेपालमा केहि गर्न नसक्ने भएर मात्र जाने भन्ने नेपालमा एउटा हेराई छ । हामी विदेश जाने भनेको अवसर नपाएर अवसर खोज्दै जाने त स्वभाविक नै हो । हामी विभिन्न मुलुकमा पुगिसकेपछि त्यहाँ हामीले पैसा कमाउनेसँगै हामीले गरेको कामको केहि न केहि सीप पनि सिकेर फर्किन्छौं । त्यसैले हामीले विदेशमा सिकेको सीप नेपालमा गएर देखाउनु पर्छ भनेर सल्लाह गर्यौं । मैले धेरै साथिहरुसँग यस बारेमा छलफल गरें । साथिहरुले सकारात्मक रुपमा लिनुभयो ।

यसरी हाम्रो विचार मिलिसकेपछि हामीले कमाएर घरखर्च चलाएर बचेको जे जति रकम छ त्यसलाई नै लगानी गरेर आयमुलक काम र मुख्य कुरा भनेको स्वरोजगार हुने लक्ष्य राख्यौं । त्यहि उद्धेश्य अनुरुप हामीले महानगर सुपरमार्केट सुरु गरेका हौं ।

हामीलाई लगानी जुटाउन समस्या नै थियो । किनकी हामी कोहि पनि धेरै पैसावाला भएर यो काम गरेका होइनौं । हामी एउटा काममा निश्चित तलव तोकिएर काम गर्न गएका हौं । त्यसैले हामी सवैले आफूले कमाएको रकमबाट जसोतसो निश्चित रकम छुट्याएर यो व्यवसाय सुरु गरेका हौं ।

ठूलो समुह चलाउन सजिलो पक्कै पनि छैन । हामी नेपाली लगानी गर्नासाथ त्यसको प्रतिफल खोज्ने गर्छौं । अर्को भाषामा भन्दा हाताहाती भनेजस्तै । यो हाम्रो नेपालको संस्कार, अभ्यास नै हो । अर्को कुरा समुहमा काम गर्ने कुरा नेपालमा भर्खरै मात्र सुरु भएको छ । फेरी हाम्रो ठूलो लगानी कसैको होइन । हामी आफूले मेहनत गरेर, पसिना बगाएर कमाएको रकम मध्ये घरखर्च चलाएर बाँकी बचाएको रकम लगानी गरेका हौं ।

यदि तपाई विदेशमा काम गर्दै हुनुहुन्छ र नेपाल फर्केर काम गर्ने रुचि राख्नुहुन्छ भनें सवैभन्दा पहिले के गर्ने हो र किन गर्ने हो भन्ने प्रष्ट दृष्टिकोण बनाउनुहोस् । त्यसपछि समुह बनाएर काम गर्दै हुनुहुन्छ भनें एकअर्कालाई विश्वास गर्ने वातावरण हुनुपर्दछ । त्यति गरेर कुनै काम सुरु गर्नुभयो भनें धैर्य पनि गर्न सक्नुपर्छ । काममा निरन्तरता हुनु पर्दछ । मैले त नेपालमा सम्भावना धेरै देख्छु नेपालमा ।

विदेशमा काम गरिरहेका साथिहरु, आफू काम गर्ने ठाउँमा अनुशासित भएर काम गर्नुस् । यसले तपाईले पैसा मात्र कमाउने होइन, ज्ञान पनि सिक्नुहुन्छ । तपाईले त्यसरी सिकेको ज्ञानलाई नेपालमा प्रयोग गरेर हामी देशलाई नै टेवा पुर्याउने काम गर्न सक्छौं ।

(युएई र कतारमा लामो समयसम्म हाइपर मार्केटमा व्यवस्थापकसम्मको अनुभव संगालेर नेपाल फर्केका निर्वाचन राई हाल महानगर सुपरमार्केटका प्रमुख कार्यकारी अधिकृत छन् । बैदेशिक रोजगारका क्रममा विदेशमा रहेका ३६ जना नेपालीले सामुहिक लगानी गरेर खोलेको महानगरको शाखा विस्तार भइरहेको छ । राईसँग गरिएको कुराकानी हरेक शनिवार प्रशारण हुने रेडियो कार्यक्रम सुनौलो मौकामा पनि प्रशारण गरिएको छ । प्रकाशित मिति २०७५ बैशाख २८)

यो पनि पढ्नुहोस् विदेशको राम्रै जागिर छोडेर स्वदेश फर्केर स्वरोजगार