राजा बगर, युएई, बैशाख २६

सरकारले छिट्टै घरेलु कामदारका लागि एकपटकका लागि पुनः श्रम स्वीकृति दिने खवरले युएईमा घरेलु कामदारका रुपमा कार्यरतहरुलाई खुशी तुल्याएको छ । उनीहरुले घर गएर पुनः काममा फर्किन पाउने भन्दै खुशी व्यक्त गरेका छन् ।

श्रम। रोजगार तथा सामाजिक सुरक्षा मन्त्रालयले हप्ता दशदिन भित्रै कुनै महत्वपूर्ण निर्णय हुने भन्दै घरेलु कामदारका लागि एकपटकका लागि पुनः श्रम स्वीकृति दिने तयारी भइरहेको समाचार मंगलवार देशपरदेशले लेखेको थियो । सो समाचारले घरेलु कामदारका रुपमा कार्यरत र पुनः रोजगारीमा फर्किन नपाउने बाध्यताका कारण घर फर्किन नपाएकाहरुलाई धेरै राहत दिएको छ ।

हेर्नुहोस् यस बारेमा व्यक्ति केहि विचारहरु, जस्ताको तस्तै

संगिता सोति, तनहुँ, हाल दुवई

नेपाल सरकारले घरेलु कामदारका रुपमा काम गर्न आएकाहरुलाई दिएको सजाय भनिसाध्य छैन । आफ्ना श्रीमान र छोराछोरी विरामी पर्दा वा मृत्यु हुँदा समेत आफ्नो देश गएर पुनः रोजगारमा आउन दिएको छन । यो ठूलो अन्याय हो । हामी दोषि छौ भने अझै सजाए देउ सरकार । हैन भने हाम्रो अधिकारको हनन गर्नु भएन ।

कि हामीलाई देशमै रोजगार देउ हामी महिलाहरु पासपोर्ट र आँखा भरि छोराछोरीको मायाको आँसु बगाउदै खाडि मुलुक आउने रहर पक्कै होइन। काम गरेर खान देउ सरकार ।

दलालहरुले केहि महिलाहरुलाई बेचेको र ठगेको पनि छ । दलाल नियन्त्रण गर्ने काम सरकारको हो। २/४ जना महिलाहरुले दुःख पाए भन्दैमा आम घरेलु कामदार माथि श्रमको रोक्का लगाउनु कहाँसम्मको न्याय हो सरकार ?

सक्छौ भने दलाललाई कारबाहि गर, हामी गरिखान आउनेहरुलाई होइन । त्यसैले हाम्रो आग्रह पुनः श्रम खोलियोस । यो असार साउनमा घरेलु कामदारहरुको बिदा हुन्छ । हामी सबै हाँसीखुसी घर फर्केर काममा आउन पाउँ ।

सरस्वति गैरै, पाल्पा, हाल दुबई

घरेलु कामदारलाई सरकारले निक्कै अन्याय गरेको छ। न स्वदेशमा रोजगारी छ न बिदेशमा आएर काम गरेर घर बिदामा जान दिएको छ। २/४ बर्षसम्म एउटी आमाले आफ्ना सन्तानहरु भेट्न नपाउँदाको पिडा सरकार चलाउनेहरु र सरकारी पुरुष कर्मचारीका श्रीमतिहरुलाई सोध्नु न ।

सरकारमा बस्नेहरु सबै बाउआमा भएका मान्छे हुन् । सन्तानको माया के हो भन्ने उनीहरुलाई पनि थाहा छ । तर हामी हाम्रो गाउँघरमा राम्रो भविष्य नदेखेर बिदेश आएर आफु खुसी नेपाल जान र आउन नपाउनु निक्कै दुर्भाग्य हो। सरकारले श्रम छिटो खुलोस र आम जनताहरुको खुसीमा सामेल होस। 

देवी दाहाल, स्याड्जा हाल दुबई 

सरकारले घरेलु कामदारको श्रम स्वीकृति रोकेर यहाँ विकराल समस्या निम्त्याएको छ । बन्देजकै कारण धेरै मेहनती तर नेपालमा कमाउने अवसर नपाएका महिला दिदीबहिनीहरु जोखिम मोलेर अवैधानिक बाटो हुँदै विदेशिक खोज्दा कतिको ज्यान गएको छ भने कतिपय शारिरीक शोषणको सिकार भएका छन । यदि सरकारले पुनः श्रम स्वीकृति दिएमा थुप्रै महिलाले विदेश आएर आफ्नो गुजारा चलाउने थिए । उनीहरुले कमाएर पठाउने रेमिट्यान्स पनि मुलुक भित्रिने छ । यति मात्र नभई श्रम स्वीकृतिलाई सहज बनाउने हो भनें दलालको फन्दामा परेर नेपाली महिलाहरु बेचिनु पर्ने थिएन ।

मिना खड्का, पोखरा, हाल दुबई

सरकारले पुनः एकपटक मात्र श्रम स्वीकृति खोल्ने नभई बैदेशिक रोजगारको उचित कानुन र मुल्याकन गर्न जरुरी छ। अशक्त श्रीमानका कारण धेरै महिला बिदेशिएका हुन्छन । आफ्नो सन्तानलाई राम्रो खुवाउन र उचित शिक्षा दिन कुन आमा पछि परेको हुन्छ र ?

सरकारले तुरुन्त श्रम खुलोस र आफ्नो इच्छाले पुनः रोजगारमा आउन चाहने महिलाहरुलाई श्रम स्वीकृति दियोस् । नयाँ कामदारलाई उचित तालिम दिएर दलाल मार्फ़त होसियार रहने गरी तयारी गरेमा राम्रो हुन्छ ।

मञ्जु कँडेल, पाल्पा, हाल युएई

श्रम, रोजगार मन्त्रिज्यू दुर्इ हात जोडेर नमस्कार। के भनेर शुरु गरौ खै ? बिगत ९ बर्षदेखि दुबईमा रोजगारीको शिलशिलामा छु । यहाँ म जस्तै हजारौ दिदिबहिनी काम गरिरहनु भएको छ। यहाँ नेपाली मात्र हैन हरेक देशका नारिहरु आफ्नो योग्यता अनुसारको काम गरिरहेका छन् । तर हाम्रो देशको सरकारबाट समय समयमा फेरिरहने कानुनले हामीहरु धेरै पिडित छौ।सजाय त गल्ती गर्नेले पाउने हो हैन र मन्त्रि ज्यू ?

मन्त्रि ज्य, सरकारले लगाएको बन्देजले कतै दलालहरुले मौकाको फाइदा लिइरहेका त छैनन ? विचार गरौं । हामि छुट्टीमा नेपाल आएर फर्किन पाउँदैनौं । फर्किन सक्छौ त केवल दलाल र एअरपोर्टका कर्मचारीलाइ पैसा बुझाएर ।

बालबच्चा, परिवार, जन्मभूमि छोडेर परदेशी हुनुमा हामी खुशी छैनौ । खुशी त यहि कुराको छ केवल हामीले अर्काको देशमा दुःख गरेका छौ र आज हाम्रा छोराछोरीको बिहान साँझ पेट भरिएको छ । स्कुलको ढोका खोलिएको छ ।  भाडामा भएपनि बास मिलेको छ। श्रम खुल्ने समाचारले हामी हर्षित छौं । हामी घर पुगेर फेरी काममा फर्किन्छौं । श्रम खोलिदेउ सरकार । 

यो पनि पढ्नुहोस् घरेलु कामदारलाई एकपटकका लागि पुनः श्रम स्वीकृति दिने सरकारको तयारी