प्रभातकुमार मिश्र, जनकपुर, बैशाख ६-

बैदेशिक रोजगारमा जान चाहने युवासँग ग्रामिण तहसम्म पहुँच, सम्पर्क एजेण्टकै छ भन्नेमा दुई मत छैन । तर त्यसरी गाउँबाट एजेण्टको पासपोर्ट संकलन गरेपछि कति तह हुँदै सो पासपोर्ट सम्वन्धित मेनपावर कम्पनीसम्म पुग्छ होला ? एक दुई वा तीन तह ? हो त्यसरी संकलन गरिएका पासपोर्ट मेनपावर कम्पनीसम्म पुग्न धेरै चरण पार गर्नुपर्ने मात्र होइन हरेक तहका एजेण्टसँगै कामदारको थाप्लोमा रकमको भारी पनि थपिंदै जान्छ । तर धनुषाका ७ जना युवा रकमको भारी थपिने मात्र नभइ पासपोर्ट नै हराएर अप्ठ्यारोमा परेका छन् ।

धनुषाको गणेशमान नगपालिका १ वीरेन्द्र बजारका ईद्रीस शवारी, कारी राईन, आजाद राईन, रामप्रसाद महरा, सन्तोष कुमार महरा, रामेश्वर महरा तथा धनुषाधाम नगरपालिकाका अतावुल कवारी गरी ७ जनाको पासपोर्ट यसरी नै एजेण्टहरुले वेपत्ता बनाइदिएका छन् ।

“हामीलाई कतार एयरवेजको क्लीनरको काममा लगाइदिने भन्दै स्थानीय एजेण्ट जासिम मियाँ कवारीले डिमाण्ड(अफर लेटर) देखाएको हो” पीडित मध्येका एक ईद्रीसले भने “त्यसपछि हामीले उसलाई पासपोर्ट बुझाएका हौं ।” मासिक १ हजार तलव र खाना खर्च वापत ३ सय गरी १३ सय रियाल तलव हुने काममा भन्दै जासिमले उनीहरुसँग पासपोर्ट लिएको पीडितहरुको भनाई छ ।

उनीहरुले पासपोर्टसँगै प्रतिव्यक्ति रु. ३० हजार पनि बुझाएका हुन् । झण्डै तीन महिना अगाडी पासपोर्ट र रकम बुझाएका उनीहरुको पासपोर्ट आफूले जीवन(अशुतोष कर्ण) लाई बुझाएको एजेण्ट जासिमले बताएका थिए । यो प्रकरणमा कर्ण दोश्रो तहको एजेण्ट हुन् ।

कर्णले ति पासपोर्ट बीरेन्द्र चौधरी भन्ने व्यक्तिलाई बुझाएको बताएका छन् । कर्णले उनी नयाँ मेनपावर व्यवसायी भएको दावी गरे । तर तीन महिनासम्म पनि बैदेशिक रोजगारमा नपठाएपछि पीडितले फोन गर्दा चौधरीले आफूले उनीहरुको पासपोर्ट फिर्ता गरिदिन अञ्जन सिग्देल भन्ने व्यक्तिलाई दिएको बताएको पीडितको भनाई छ । हाल जासिम सम्पर्कविहिन छन् ।   

राम्रो रोजगारीमा जान प्रतिव्यक्ति १ लाख २५ हजार तिर्ने शर्तमा बुझाएको पासपोर्ट हराएपछि तथा रकम समेत फिर्ता नभएको भन्दै न्याय दिलाइदिन पीडितहरुले जनकपुरस्थीत सुरक्षित आप्रवासन सुचना तथा पारामर्श केन्द्रमा निवेदन दिएका छन् ।   

यो पनि पढ्नुहोस् ‘विदेशबाट स्वदेश फर्केर काम गर्ने हो भनें‘