काठमाडौं, बैशाख ३-

बैदेशिक रोजगारमा मलेसिया जाने नेपाली कामदारलाई शोषण गर्न खडा गरिएका विभिन्न कम्पनी खारेज गर्न सरकारले पहल थालेको छ । रोजगारीका लागि मलेसिया जाने कामदारलाई भिएलएन, माइग्राम, वान स्टप सेण्टर लगायत विभिन्न नाममा खोलिएक संस्थाले ठूलो आर्थिक शोषण गर्दै आएका छन् ।

ति संस्थाहरु खारेज गर्ने व्यवस्थाका लागि परराष्ट्र मन्त्रालय मार्फत पहल सुरु भएको छ । श्रम रोजगार तथा सामाजिक सुरक्षा मन्त्री गोकर्ण विष्टले परराष्ट्र मन्त्रालय मार्फत त्यसको पहल भइरहेको जानकारी दिए । “छाप लगाउने नाममा, स्वास्थ्य जाँच गर्ने नाममा भइरहेको सिण्डिकेट हट्नेछ” मन्त्री विष्टले भने “त्यसका लागि प्रकृया सुरु भइसकेको छ ।” उनले बेथितिको दशकौंको चाङ हटाउन केहि समय लाग्ने भन्दै अहिले आफूले परराष्ट्र मन्त्रालय र गृह मन्त्रालयसँगको समन्वयमा सो प्रयत्न गरिरहेको बताए ।

मन्त्रालयमा आयोजित पत्रकार सम्मेलनमा मन्त्री विष्टले जहिलेसुकै पनि राज्यले बहुसंख्यक नागरिकको हित हेर्ने भन्दै सकेसम्म सरकारी तवरबाट नै कामदार पठाउने गरी अध्ययन भइरहेको बताए । उनले भने राज्यले धेरै भन्दा धेरै नागरिकको हित हेर्ने हो सोही अनुरुप निर्णय हुन्छ ।

उनले युएईउ तथा कतारसँग नेपालको सरकारी अस्पतालले गर्ने स्वास्थ्य परिक्षणको रिपोर्टलाई नै मान्यता दिनेगरी कुरा भइसकेको र नेपालका सरकारी अस्पतालहरुको प्रयोगशालाको गुणस्तर सुधार गर्नुपर्ने भएमा त्यसमा पनि सुझाव दिन स्वास्थ्य मन्त्रालयको समेत संलग्नतामा कार्यदल गठन भइसकेको बताए ।

यो पनि पढ्नुहोस्

नेपालीलाई सहयोग गर्न नियोगहरुमा स्थानीय कर्मचारी राखिने

विदेशमा जेल परेका नेपालीलाई सरकारले कानून व्यवसायीको सहयोग दिने