रञ्जना लम्साल, नवलपरासी, चैत्र २६-

चन्द्र बहादुर चौधरी मलेसिया गएको ४ बर्ष भयो ।  सेक्युरिटी गार्डको काममा उनी गएका हुन् । कमाई ठिकै थियो । महिनामा २०/२५ हजारका दरले घरमा पैसा पठाइरहेका थिए ।

एकबर्ष अगाडी घरमा चन्द्र बहादुरका बाबु बेचन चौधरी एक्कासी बिरामी परे । कडा व्लड प्रेसरका कारण प्यारालाईसीस भयो । उनी हिंड्डुल गर्न सक्दैनन् । बाबु त्यसरी ओछ्यान परेपछि चन्द्रबहादुरलाई घर फकिृन परिवारले आग्रह गरे । तर उनी आएनन् ।

करार अवधि पनि सकियो । तर उनी नेपाल फर्केनन् । हरेक पटक परिवारसँग म आइहाल्छु भन्दै टारिरहे । २०७४ साल फाल्गुन १२ गते परिवारले खबर पायो, अबैधानिक रुपमा बसोबास गरेको अभियोगमा चन्द्र बहादुर मलेसियामा पक्राउ परे ।

छोरो जेल परेको सुनेदेखि चन्द्र बहादुरका बाबु बेचनको आँखा ओभानो छैनन् । उनी छोरालाई घर फर्काओ भनेर भनिरहन्छन् । तर परिवारका अन्य सदस्यलाई थाहा छैन उनी कसरी नेपाल फर्किने हुन् । श्रीमानलाई जेलमुक्त गरी नेपाल फर्काइदिन सहयोगको हारगुहार माग्दै चन्द्र बहादुरकी श्रीमती किशान्ति चौधरीले सुचना तथा परामर्श केन्द्र कावासोतीमा निवेदन दिएकी छन ।

संगै जेलमा बसेर आएको एकजना साथीले मलेशियाको जेल र बडी नम्बर उपलब्ध गराउँदै चन्द्र बहादुरलाई जेलमा निकै कष्ट सहनु परेकाले तुरुन्तै निकाल्न परिवारलाई फोन मार्फत जानकारी गराएका छन् । उनका अनुसार हाल चन्द्र बहादुर बुकित ईमिग्रेशन डीपो केलाङ्गमा रहेका छन् ।

सुचना तथा परामर्श केन्द्र कावासोतीले चन्द्र बाहादुरलाई नेपाल फिर्ता गर्न प्रवासी नेपाली समन्वय समिति मार्फत पहल थालेको जनाएको छ । केन्द्रका कार्यक्रम संयोजक रितुराम सोती थापाले उनलाई जेल मुक्त गर्न प्रयास भइरहेको र उनलाई अन्य कुनै अभियोग नलागेकाले छिटै नेपाल फिर्ता गर्न सुचना केन्द्रको तर्फबाट प्रयास भैरहेको जानकारी जानकारी गराएका छन् ।

यो पनि पढ्नुहोस् सरकारले विदेशबाट नै पुनः श्रम स्वीकृतिको व्यवस्था मिलाउने