प्रभातकुमार मिश्र, धनुषा, फागनु २९-

धनुषाका एक व्यक्ति साउदी अरवमा कम्पनीले तलव नदिंदा अप्ठ्यारोमा परेका छन् । रोजगारीका लागि ६ महिना अघि ट्रक ड्राइभरको रोजगारीका लागि साउदी पुगेका रामचन्द्र महतो कम्पनीले तलव समेत नदिएपछि समस्यामा परेका हुन् । उनी साउदी अरवस्थीत सालेम हादि अल क्वहतनी ट्रान्सपोर्ट कम्पनीमा कार्यरत छन् ।

धनुषा गणेशमान नगरपालिका ३ बीरेन्द्र बजारका महतोलाई कम्पनीले भने अनुसारको काम दिएपनि ८ महिनामा तलव स्वरुप जम्मा ११ सय ३० रियाल दिएको छ । महतोका आफन्त बिनयकुमार महतोले आफ्ना साढुभाईको उद्धार गरि नेपाल फर्काइदिन आग्रह गर्दै सुरक्षित आप्रवासन परियोजना(सामी) द्धारा जनकपुरमा सञ्चालित सुचना केन्द्रमा निवेदन दिएका छन् ।

४ छोराछोरीका बाबु ४० बर्षिय महतो राजधानीस्थीत वल्र्ड लिंक ह्युमन रिसोर्स सोलुसन मार्फत साउदी अरव गएका हुन् । उनलाई सो मेनपावर कम्पनीमा सम्पर्क गराउने स्थानीय एजेण्ट लव्ली बुढाथोकीले भनें आफू विरुद्ध उजुरी गरेको भन्दै पीडितको उद्धारमा कुनै सहयोग नगर्ने बताएको बिनयले बताएका छन् ।

हाल पिसावमा रगत देखिने तथा ढाड दुख्ने समस्याबाट पीडित महतोको कम्पनीले उपचार पनि नगराएको र स्वदेश फर्किन पनि नदिएको भन्दै उनको उद्धारका लागि परिवारले सम्वन्धित निकायसँग आग्रह गरेको छ ।

यो पनि पढ्नुहोस् ‘एजेण्टको पारिश्रमिक तोक, अनुगमन गर’