दुवई, माघ २१-

युएई सरकारले लगाएको रोजगार अनुमतिका लागि अनिवार्य रुपमा प्रहरी रिपोर्ट पेश गर्नुपर्ने व्यवस्थापछि अव यहाँ कार्यरतहरुले कसरी प्रहरी रिपोर्ट बनाउने भन्ने खुल्दुली सुरु भएको छ । नेपालबाट आउनेहरुले नेपालबाट नै प्रहरी रिपोर्ट बनाउनु पर्ने भएपनि युएईमा कार्यरतहरुले युएईको प्रहरीबाट नै यस्तो रिपोर्ट बनाउनु पर्ने यहाँका सञ्चार माध्यमहरुले समाचार लेखेका छन् ।

असल व्यहार भएको प्रहरीद्धारा प्रमाणित रिपोर्टका लागि युएईमा कार्यरतहरुले दुवई प्रहरीमा आवेदन दिनुपर्नेछ । यसका लागि नजिकैको कुनै पनि प्रहरी कार्यालयमा गएर आवेदन दिन सकिने जनाइएको छ । यस्तो आवेदन अनलाइन मार्फत पनि दिन सकिनेछ ।

प्रहरी कार्यालयमा नै गएर आवेदन दिन चाहनेहरुले आफूलाई पायक पर्ने कुनै पनि प्रहरी कार्यालय वा सिआइडी अफिसमा विहान ७ः३० देखि २ः३० को बीचमा आइतवार देखि विहिवारसम्म जान सक्ने जनाइएको छ ।

यसरी उपलव्ध गराइएको प्रमाणपत्र तीन महिनाका लागि मान्य हुनेछ । यसैगरी ९०१ मा फोन गरेर पनि जानकारी हासिल गर्न सकिनेछ ।

युएईमा प्रमाणपत्र बनाउन चाहनेहरुका लागि २ सय २० दिराम शुल्क लाग्ने जनाइएको छ । यसरी प्रहरीको रिपोर्ट प्राप्त गर्न ईमेल ठेगाना तथा ईमिरेट्स आइडी आवश्यक पर्ने र त्यस्तो आइडी म्याद सकिएको भएमा पनि काम हुने समाचारमा जनाइएको छ ।

नेपालमा भनें यसविषयमा अझै पनि अन्यौल नै रहेको छ । ठूलो संख्यामा युएई आउनेहरुलाई कसरी प्रहरी रिपोर्ट उपलव्ध गराइन्छ भनेर कुनै व्यवस्था भइसकेको छैन । यसले तत्काल युएई जान चाहनेहरुलाई झण्झट सिर्जना हुन सक्दछ । 

यो पनि पढ्नुहोस् अव युएईमा रोजगारीका लागि प्रहरी रिपोर्ट चाहिने, सुरु भयो नयाँ नियम