प्रभातकुमार मिश्र, जनकपुर, माघ ७-

धेरैले सुनेको हुन्छन् विदेशमा त कुनै कम्पनीमा काम गर्ने सम्झौता गरेर जाँदा सोही कम्पनीको खटनपटन अनुसार काम गर्नुपर्छ । उसले गर् भनेको काम गर्नुपर्छ, जा भनेको ठाउँमा जानु पर्छ । त्यस्तो बन्धनमा कसरी नफस्ने । दलालसँग अनेक उपाय छन् । आजाद । अर्थात स्वतन्त्र । स्वतन्त्र भएर जुनसुकै कम्पनीमा काम गर्न पाइने र मन लागेको बेलामा घर फर्किन पनि पाइन्छ भन्ने सुनेपछि नलोभ्भिने कुरै भएन । हो, यसैले आजाद भिषाको खेती मौलाइरहेकै छ । यसैको मारमा परेका छन् धनुषाका एक युवा । 

धनुषा क्षिरेश्वर नगरपालिका ३ का उमेश यादव त्यहि धेरै कमाउने सपना देख्दा ठूलो ठगिको शिकार भएका छन् । मासिक १५ सय रियाल(झण्डै ४२ हजार) तलव हुने काम पाइने प्रलोभनमा १ लाख ७० हजार लगानी गरेर यादव ७ महिना अगाडी कतार पुगेका थिए । धनुषाकै राजकुमार रविदासले कतारमा कार्यरत आफ्ना भाई पञ्चा कुमार रविदासले आकर्षक कमाई हुने रोजगारीमा लगाइदिने भन्दै यादवसँग १ लाख १० हजार लिएको यादव बताउँछन् ।

उनकै भर परेर १ लाख १० हजार बुझाएर तथा हवाई टिकट, श्रम स्वीकृति, स्वास्थ्य परिक्षण लगायतमा थप ६० हजार लगानी गरेर कतार पुगेका यादवले कुनै रोजगारी पाउन सकेनन् । ६ महिनासम्म कुनै काम नपाएका उमेश अन्ततः घर फर्किन सहयोग माग्दै दोहास्थीत नेपाली दूतावास र कतारको प्रहरीको चक्कर काट्न थाले । खान, बस्न समेत समस्या भोगेका उमेश लामो प्रयत्नपछि अन्ततः नेपाल फर्किन सफल भएका छन् ।   

हुसेन अल गराफा जेनरल कन्ट्राक्टिङ नामको कम्पनीको रोजगार सम्झौतामा कतार पुगेका उनले सो कम्पनी फेला समेत पार्न नसकेको बताउँछन् । उनले लिएको श्रम स्वीकृतिमा उनको रोजगारी जिप्सम टेक्निसियनको उल्लेख छ । 

नेपाल फर्केका उनले आफ्नो लागत सहित क्षतिपूर्ति दिलाई पाउँ भन्दै धनुषा स्थीत सुरक्षित आप्रवासन सुचना तथा परामर्श केन्द्रमा निवेदन दिएका छन् । केन्द्रले उनको क्षतिपूर्तिका लागि प्रकृया अगाडी बढाएको जनाएको छ । 

यो पनि पढ्नुहोस् जो स्वदेशमा नै परिश्रम गरेर मासिक २ लाख कमाउँछन्