रमा मगर, उदयपुर, पुष २०-

साउदीमा काम र तलब नपाएको भन्दै बलबहादुर राईको आफन्तले कन्सुलर विभागमा उजुरी दिएका छन् । तर आफूहरुको उजुरीका सम्वन्धमा कुनै पनि काम कारबाही नभएको पीडितको गुनासो छ ।

उदयपुरगढी गाउँपालिका ८ खोल्मे बस्ने बल बहादुर २०७३ साल पुष ५ गते श्रम स्वीकृति लिएर रोजगारका लागि साउदी अरबको मोदी अल बकावी फार्ममा गएका थिए । उनी अल्झा इन्टरनेशनल मेनपावर कम्पनी मार्फत साउदी पुगेका हुन् । विदेश जान सयकडा तीनका दरले व्याज बुझाउने गरी ८० हजार ऋण काढेर गएका उनी एक वर्ष बितिसक्दा पनि साहुलाई न व्याज तिर्न सक्ने भएका छन्, सावाँको त कुरा पर नै भइगयो ।

उनको सम्झौतापत्रमा कृषिको काम लेखिएको छ भनें तलव १४ सय रियाल । तर काम र दाम दुवै उल्टो परेको छ । हाल उनले गर्नु पर्ने काम मेशन(डकर्मी) हो भनें पाउने तलब १२ सय भएको छ । त्यसमा पनि विगत दुई महिना देखि कम्पनी बन्द भएकाले न त काम नै छ न त तलव नै । त्यसैले साउदीमा अलपत्र छन् उनी ।

बल बहादुरसँग म्याग्दी युवराज सार्की, कपिलवस्तुका राम बृक्ष केवर, भोजपुरका अम्बर सुनुवार पनि साथमै छन् । सबैको इच्छा छ अव नेपाल फर्केर क्षतिपूर्ति पाउँ भन्ने ।

बल बहादुरले नेपाल फिर्ता गरी पाउँ भन्दै ०७४ साल भदौ २२ गते रियादस्थीत नेपाली दूतावासमा निवेदन पनि हालेका छन् । उनको उजुरी नं. २१३४ हो । तर हालसम्म उनलाई नेपाल फर्काउने विषयमा केहि भएको छैन । बसेको ठाउँबाट दूतावास निक्कै टाढा छ । त्यसैले पटक पटक उनी धाइरहन पनि सक्दैनन् । फोन गर्दाै दूतावासमा फोन उठ्दैन । उठिहालेपनि आफ्नो समस्याको सुनुवाई नभएको बल बहादुरको गुनासो छ ।

साउदीबाट गरेको प्रयत्नले नपुगेपछि उनका भाइ लील बहादुर राईले नेपालमा कन्सुलर विभागमा गत मंसिर १४ गते उजुरी दिएका थिए । तर ३५ दिन बित्दा पनि बल बहादुरको उद्धार भएको छैन । काठमाडौं धाउँदा धाउँदा अव त लील बहादुरलाई पनि दिक्क भइसकेको छ । आज (पुष २० गते) मात्र पनि उनी कन्सुलर विभाग पुगेका थिए जहाँबाट पुनः सोमवारसम्म पर्खिनु भन्ने जवाफ पाएका छन् । लील बहादुरका अनुसार त्यहाँ कार्यरत अधिकृत रमा भटराईले आगामी सोमबार मात्र बल बहादुरलाई नेपाल फिर्ता गर्न आवाश्यक छ कि वा छैन भन्ने कुरा निश्चित हुने बताएकी छन । उद्धारको काम कछुवा गतिमा भएको देख्दा यसले पीडितका परिवारलाई उनको उद्धार सम्भव होला नहोला भन्ने दोधारमा पारिदिएको छ ।

बल बहादुरले मद्धत माग्दै उदयुपरमा जिल्ला समन्वय समितिद्धारा संचालन गरीएको सूचना तथा परामर्श केन्द्रमा फोन गरेर आफूलाई पठाउने मेनपावर कम्पनी, दूतावास र नेपालमा कन्सुलर सेवा विभागले समेत कुनै सहयोग नगरेको गुनासो गरे । आफूहरु बिदेशमा खाना खान समेत नपाउने अवस्थामा पुगेको र अरुको सहयोग माग्दै हिंड्नु परेको उनको भनाई छ । घरमा उनका बृद्धआमा, श्रीमति र बालबच्चा छन् । 

यो पनि पढ्नुहोस् विदेशमा हराएको श्रीमानलाई पर्खिंदै