अम्विका दाहाल, खोटाङ, पुष १९-

नेपालमा मेनपावर कम्पनीले भने अनुसारको काम र तलव नपाएर कतारबाट फर्केका दुईजनाले म्यानपावर कम्पनीबाट विदेश जाँदा तिरेको रकम फिर्ता पाएका छन् । खोटाङका राजेन्द्र खड्का र कर्ण खड्काले उनीहरुलाई रोजगारीमा पठाउने मेनपावर कम्पनीबाट जनही ७० हजारका दरले रकम फिर्ता पाएका हुन् । 

१० महिना अघि कतारको स्नो ह्वाईट कम्पनीमा कारवासको काममा भनेर पठाइएका उनीहरुलाई त्यहाँ पुगेपछि जे आइपर्छ सोही काम गर्न बाध्य बनाइएको थियो । त्यसो गर्दा समेत ९ महिना काम गर्दा २ महिनाको मात्र तलव पाएपछि उनीहरु गत मंसिरमा नेपाल फर्किएका थिए ।

नेपाल फर्केपछि उनीहरुले जव लिंक मेनपावार कम्पनीलाई आफूहरुलाई पठाउँदा तिरेको रकम फिर्ता गरिदिन आग्रह गरेका थिए । सुरुमा मेनपावर कम्पनीले रकम फिर्ता गर्न आलटाल गरेपछि उनीहरुले दिक्तेलस्थीत सुरक्षित आप्रवासन, सुचना तथा परामर्श केन्द्रमा रकम फिर्ता गराइदिन निवेदन दिएका थिए । उनीहरुसँग मेनपावर कम्पनीले रकम तिरेको कुनै भपाई नभएपनि आइएमई मार्फत रकम पठाएको भौचरका आधारमा सुचना केन्द्रले रकम फिर्ता गराउन पहल गरेको थियो ।     

यो पनि पढ्नुहोस् खाडी मुलुकमा लगाइएको भ्याटले कामदारलाई कस्तो असर गर्छ ?