काठमाडौं, पुष १२–
श्रम तथा रोजगार राज्यमन्त्री डिल्लीबहादुर चौधरीले युवालाई स्वदेशमा नै बसेर रोजगारी गर्ने वातावरण निर्माण गर्न आवश्यक रहेको बताएका छन् । उनले यसका लागि स्वदेशमा नै धेरै भन्दा धेरै कलकारखाना खोल्न जरुरी रहेको बताए ।
संयुक्त ट्रेड युनियन समन्वय केन्द्र(जेटीसूसीसी) को युवा भेलाको उद्घाटन गर्दै राज्यमन्त्री चौधरीले नीजि क्षेत्रले रोजगारी प्रवद्र्धनको क्षेत्रमा केहि काम गरिरहेको भन्दै यसमा सरकारले पहल गर्नुपर्ने बताए ।
सो अवशरमा बोल्दै जेटीयूसीसीका अध्यक्ष गणेश रेग्मीले प्राप्त अधिकारलाई कार्यान्वयन गर्न र थप अधिकार प्राप्तीका लागि एकतावद्ध भएर अगाडी बढ्न आवश्यक रहेको बताए । उनले व्यवसायी तथा सरकारसँग लड्न नेपालका ट्रेड यूनियनहरुले संयुक्त मञ्च बनाएर गरेको काम विश्वकै लागि उदाहरणीय भएको धारणा राखे । कुनै पनि नाममा ट्रेड यूनियनहरु विभाजित, खण्डित हुन नहुने भन्दै रेग्मीले स्थीरताको पक्षमा वकालत गर्न सवैलाई आग्रह गरे ।
जेटीयूसीसीका पूर्व अध्यक्ष समेत रहेका नेपाल ट्रेड यूनियन काँग्रेसका अध्यक्ष खीलानाथ दाहालले युवा परिवर्तनका सम्वाहक भएको भन्दै उनीहरुले सामाजिक, आर्थिक र राजनीतिक परिवर्तनमा धेरैठूलो भूमिका खेल्ने बताए । उनले नेपाली युवाले सीप सिक्दै अझ प्रतिस्पर्धी हुन जरुरी रहेको धारणा राखे ।
सो अवशरमा बोल्दै जिफन्टका महासचिव विष्णु लम्सालले सरकार सञ्चालन गर्नेहरुको ध्यान स्वदेशमा नै रोजगारी सिर्जना गर्नेतर्फ कम पुगिरहेको बताए । राणाकालिन संरचनामा बसेर राज्य सञ्चालन गर्नेहरुको सोचाई समेत फेरिन नसकेको भन्दै महासचिव लम्सालले भएका उद्योग कलकाराखाना समेत नीजिकरणको नाममा सिध्याइएका कारण युवा बाध्य भएर रोजगारीका लागि बाहिरइरहेको धारणा राखे । उनले राष्ट्रवादको भावना बलियो हुनुपर्नेमा जोड दिंदै युवाले नै भविष्यको ट्रेड यूनियन आन्दोलनलाई शसक्त बनाएर लैजाने बताए ।
सो अवशरमा बोल्दै पेशागत महासंघ नेपाल(कोनेप) का अध्यक्ष विश्वनाथ प्याकुरेलले लाखौं युवा रोजगारीको खोजिमा खाडी जान बाध्य भएको भन्दै त्यसलाई अन्त्य गर्नुपर्ने धारणा राखे । उनले सरकारले रोजगारी सिर्जना गर्न नसकेका कारण यो समस्या आइपरेको भन्दै यसको अन्त्य हुनुपर्ने बताए ।
यो पनि पढ्नुहोस् मलेसिया पुनः १ नं गन्तव्य